Ձեր վստահելի աղբյուրը

Հայկական ավանդական ընտանիքի մոդելը 1988 թվականից հետո փոխվել է,- լրագրողների հետ հանդիպման ժամանակ ասաց հոգեբան Իրինա Ծատուրյանը:

Նա նշեց, որ, հիմնվելով  սեփական հետազոտությունների վրա, ղարաբաղյան պատերազմը, սոցիալական վիճակը, աշխարհում տեղի ունեցած փոփոխություններն հայկական ընտանիքների վրա ազդեցություն են ունեցել:  

«Պատերազմում ունեցանք զոհեր, եղան նաև վիրավորված, հաշմանդամություն ձեռք բերած տղամարդիկ, որն իր հետ բերեց այն վիճակը, երբ կինը նույնպես դարձավ ընտանիքի կերակրող: Սա բերեց իր հետ նոր խնդիրներ»,- ասաց հոգեբանը:

Ի.Ծատուրյանի խոսքով, եթե մինչև 1988 թվականը Հայաստանում ամուսնալուծությունները վախեցնող  տոկոս չէր կազմում, այժմ իրավիճակն այլ է: Տարբեր տեղերից հավաքած տվյալների վրա հիմնվելով՝  նա նշեց, որ 2013-ին 1000 ամուսնության դեպքում  գրանցվել է 205 ամուսնալուծություն:

Ըստ հոգեբանի, Հայաստանում ամուսնալուծությունների պատճառները տարբեր են: Ի.Ծատուրյանն ասաց, որ այդ պատճառների մի մասն ընդհանուր են, նաև մյուս երկրներին են բնորոշ, սակայն կան միայն Հայաստանին հատուկ պատճառներ: Օրինակ, նրա խոսքով, որոշ դեպքում տղամարդկանց արտագնա աշխատանքը,  ծնողների կողմից միջամտությունը:

ՄԱԿ-ի գլխավոր ասամբլեան 1993թ.-ին կազմակերպության անդամ երկրներին կոչ է արել ամեն տարի մայիսի 15-ը որպես Ընտանիքի միջազգային օր տոնել։ Ներկայումս Ընտանիքի օրը տոնում են Սլովակիայում, Լիտվայում, Լատվիայում, Տաջիկստանում, Բելառուսում, Ուկրաինայում և մի շարք այլ երկրներում։ 2011թ. փետրվարի 9-ին ԱԺ-ն ընդունեց «ՀՀ տոների և հիշատակի օրերի մասին» ՀՀ օրենքում լրացում կատարելու մասին» օրենքը, որով մայիսի 15-ն ամրագրվեց որպես Ընտանիքի օր: