Ձեր վստահելի աղբյուրը

Հայաստանի և Ադրբեջանի նախագահները կհանդիպեն մայիսի 16-ին Վիեննայում՝ քննարկելու Լեռնային Ղարաբաղի իրավիճակը՝ երկու տասնամյակի ընթացքում ամենաթեժ բախումներից հետո։ Այս մասին, ինչպես գրում է Euractiv-ը , հայտնել են ԵԱՀԿ Մինսկի խմբի միջնորդները։ Սպասվում է, որ հանդիպմանը ներկա են լինելու նաև ԱՄՆ և ՌԴ դիվանագետներ։

ԱՄՆ-ի, ՌԴ-ի և Ֆրանսիայի բարձրաստիճան դիվանագետները, ովքեր ջանքեր են կատարում տասնամյակներ շարունակվող թշնամանքին վերջ դնելու համար, սպասվում է, որ մասնակցելու են բանակցություններին, որի նպատակն է ամրապնդել փխրուն հրադադարը, որն հաստատվել է Մոսկավայի միջնորդությամբ։ Հանդիպմանը Եվրամիության պատվիրակ չի մասնակցելու։

Ինչպես հայտնել է ՌԴ ԱԳՆ մամլո խոսնակ Մարիա Զախարովան, Հայաստանի և Ադրբեջանի նախագահների հանդիպումը նախատեսվում է հաջորդ շաբաթ։

Նախօրեին Ֆրանսիայի Եվրոպական հարցերով պետքարտուղար Հարլեմ Դեզիրը ևս հաստատել է, որ հանդիպումը կայանալու է երկուշաբթի՝ մայիսի 16-ին։

Ինչպես գրում է կայքը, սպասվում է, որ հանդիպմանը մասնակցելու են նաև ՌԴ ԱԳ նախարար Սերգեյ Լավրովն ու ԱՄՆ պետքարտուղար Ջոն Քերրին։

Վերլուծաբանները ափսոսանք են հայտնում, որ Եվրամիությունը չի մասնակցում լարվածությունը մեղմելու ջանքերին։ Անգամ Հռոմի Ֆրանցիսկոս պապն է նախատեսում այցելել Հայաստան և Ադրբեջան՝ ակնհայտ դիվանագիտական ջանքեր ներդնելու համար, այնինչ ԵՄ պաշտոնյաները նման հրապարակային պլաններ չունեն։

«Եվրոպական քաղաքականության կենտրոնի վերլուծաբան Ամանդա Փոլը նշում է, որ ապրիլի սկզբին Լեռնային Ղարաբաղում 4-օրյա պատերազմից հետո հնարավոր  կլինի տեսնել փոփոխություններ բանակցային սեղանին, քանի որ Բեռլինը նշում է, որ ցանկանում է առավել մեծ դերակատարում ստանձնել այս հարցում»,-, գրում է Euractiv-ը։