Ձեր վստահելի աղբյուրը

Տարեցտարի «Թանգարանների միջազգային օրը» և  «Թանգարանների գիշեր» միջոցառմանը Հայաստանում ավելի ու ավելի շատ մարդ  է այցելում թանգարանում, ավելացնել են ընտանիքներով այցելությունները,- ասաց ՀՀ մշակույթի նախարարության մշակութային ժառանգության և ժողովրդական արհեստների վարչության գլխավոր մասնագետ Գոհար Սաիյանը:

Համեմատության համար նշեց, որ եթե 2010-ին մասնակցել է 34 թանգարան, ունեցել են 20 հազար այցելու, 2015-ին մասնակցել է 111 թանգարան, ունեցել են 200 հազարից ավելի այցելու:

Մայիսի 18-ին՝ «Թանգարանների միջազգային օրը», մայիսի 21-ին՝ «Թանգարանների գիշեր» միջոցառմանը, նրա, խոսքով, այս տարի մասնակցելու է Հայաստանից և Արցախից 112 թանգարան: Մայիսի 18-ին թանգարանների մուտքն անվճար է լինելու ժամը 10:00-18:00-ն, մայիսի 21-ին՝ ժամը 18:00-24:00-ն:  Աշխարհի 5 մայրցամաքի ավելի քան 30 թանգարան մասնակցում է այս միջոցառումներին:

Գ. Սաիյանն ասաց, որ այդ օրերին թանգարանները հանդես են գալու հատուկ միջոցառումներով, դասախոսություններով, բացօթյա ցուցադրություններով, համերգային, կրթական ծրագրերով: Այս տարի միջոցառումները նվիրվում են Հայաստանի անկախության 25-ամյակին:

«Այս միջոցառումների նպատակն է բարձրացնել թանգարանների դերը հասարակության կյանքում, նպաստել թանգարանային առարկաների, մշակութային արժեքների հանրահռչակմանը»,-  նշեց նա:

Ասուլիսին ներկա ԻԿՕՄ-ի Հայաստանի ազգային կոմիտեի նախագահ Մարինե Հարոյանն ասաց, որ յուրաքանչյուր տարի առաջադրվում է օրվա խորհրդին առնչվող որևէ յուրահատուկ թեմա, ինչը հնարավորություն է տալիս շեշտելու թանգարանների գործունեության բազմազանությունը: Այս տարվա կարգախոսն է` «Թանգարանները և մշակութային լանդշաֆտները»:

«Խորագիրը պատահական չի ընտրվել: Այսօր թանգարանների զարգացման վեկտորը փոխվում է: Եթե 25-30 տարի առաջ թանգարանների հիմնական խնիդրն էր հավաքածուները դարձնել հասանալեի,  նպաստեր հասարակության կրթմանը, վերջին երկու տարվա ընթացքում վեկտորը փոխվել է դեպի սոցիալական պատասխանատվություն: Այս տարվա  խորագիրը հուշում է, որ թանգարանները պատասխանատու են ոչ միայն ներսում գտնվող հավաքածուների պահպանության, ներկայացման համար, այլ նաև այն ամենի, ինչ կատարվում է  թանգարանից դուրս՝ լինի բնական, քաղաքային, մշակութային լանդշաֆտ»,- ասաց նա:

Ըստ Մարինե Հարոյանի, թանգարանները պետք է օգնեն համայնքների խնդիրների լուծմանը. «Կարող է սոցիալական խնդիրներ ունեցող ընտանիքներին ծրագրերի շրջանակում բերել թանգարան,  մի փոքր փոխել նրանց միջավայրը, տոն ստեղծել նրանց համար»:

Մայիսի 18-ին և 21-ին  ՀՀ-ի և Արցախի թանգարաններում կազմակերպվելիք միջոցառումներին կարելի է ծանոթանալ՝ այստեղ: