Ձեր վստահելի աղբյուրը

Թանգարանների միջազգային օրը՝ մայիսի 18-ին,  Երևանի Ռուսական արվեստի թանգարանում ներկայացվելու է Տարոն Սիմոնյանի «Զբոսանքներ Պետերբուրգով» շարքից մի մոնումենտալ կտավ՝ «Մարինյան թատրոն: Աիդա»:  Այս մասին Panorama.am-ին տեղեկացրեց Ռուսական արվեստի թանգրանի հանրահռչակման բաժնի վարի Տաթև Սարոյանը:

Նա նաև հայտնեց, որ մայիսի 21-ին Թանգարանային գիշեր միջոցառման շրջանակներում Տարոն Սիմոնյանը  թանգարանում ելույթ կունենա «Զբոսանքներ Պետերբուրգով» թեմայով, որի ընթացքում կներկայացնի հին ու նոր Պետերբուրգը՝ իր արտիստական և հետազոտական տեսանկյունից:

Տարոն  Սիմոնյանը մշակութաբան-արվեստագետ է: Նրա գեղանկարչական տաղանդը համատեղվում է հետազոտական հետաքրքրության հետ տարբեր էթնիկ մշակույթների հանդեպ: Գեղարվեստական կրթությունը ստանալով Պետերբուրգում՝ նկարիչը շատ է ճանապարհորդել Եվրոպայի, Ասիայի և Աֆրիկայի երկրներով: Սակայն Պետերբուրգն իբրև իր հարազատ քաղաք, նրա համար առանձնահատուկ նշանակություն ունի:

2010 թ. Տարոնը ստեղծել է 12 կտավներից բաղկացած  «Զբոսանքներ Պետերբուրգով» գեղանկարչական շարքը: Այն ամբողջությամբ ներկայացվել է նույն այդ տարում Սանկտ-Պետերբուրգի «Ազգությունների տանը»:

«Հնի ու նորի համատեղմամբ նկարիչը ներկայացնում է քաղաքի գեղարվեստական ժառանգությունը ժամանակակից կյանքի միջով: Նրան հատկապես հուզում է 19-20 դարագլուխների պետերբուրգյան գեղարվեստական կյանք տեղափոխող  թատերական թեման, որը կերտող արվեստագետների գործերը ներկայացված են Ռուսական արվեստի թանգարանում: Դարաշրջանների հենց այսօրինակ արձագանքումների և մշակութային լանդշաֆտների խաչաձևման համատեքստում է, որ 2016 թվականի  Թանգարանների միջազգային օրվա՝ «Թանգարանները և մշակութային լանդշաֆտները» խորագրի ներքո Ռուսական արվեստի թանգարանը ներկայացնում է Տարոն Սիմոնյանի «Զբոսանքներ Պետերբուրգով» շարքից մի մոնումենտալ կտավ՝ «Մարիինյան թատրոն: Աիդա»»,- ասաց Տ.Սարոյանը:

Տարոն Սիմոնյանը ծնվել է 1979 թ. Երևանում քանդակագործ Ցոլակ Սիմոնյանի և բանասեր Անահիտ Մինասյանի ընտանիքում: Տարոն Սիմոնյանը մեծացել ու կրթվել է Սանկտ-Պետերբուրգում, որտեղ Գեղարվեստի ակադեմիայի Բ. Յոհանսոնի անվ. Գեղարվեստական դպրոցում սովորելուց հետո (1990-1995 թթ.) ուսանել է Բարոն Շտիգլիցի հանրահայտ Գեղարվեստա-արդյունաբերական Ակադեմիայում (1995-2001 թթ.), այնուհետև Գերմանիայում, Լյուբեկի Դիզայնի դպրոցում (2002-2003 թթ.): Տարոն Սիմոնյանը մի քանի տասնյակ միջազգային ցուցահանդեսների մասնակից է, այդ թվում Դուբայում, Իտալիայում, Ռուսաստանում, Իսպանիայում, Ճապոնիայում և Հայաստանում: Արվեստագետը նաև հայ մշակույթի հանրահռչակմամբ է զբաղվում արտերկրում: