Ձեր վստահելի աղբյուրը

Երևանի պատմության թանգարանը «Թանգարանների միջազգային օր»  և «Թանգարանների գիշեր» միջոցառումներին հանդես է գալու ոչ միայն անհատական ծրագրերով, այլ նաև ընդգրկվել է մեկ ընդհանուր ծրագրում, որը մայիսի 21-ին  իրականացվելու է  «Էրեբունի» պատմահնագիտական  արգելոց-թանգարանի բացօթյա ցուցասրահում: Լրագրողների հետ հանդիպման ժամանակ ասաց Երևանի պատմության թանգարանի տնօրեն Արմինե Սարգսյանը:

Նա նշեց, որ  «Էրեբունի» թանգարանի բացօթյա ցուցասրահում ներկայացվելու է Հին Երևանի լուսանկարները. «Այդ լուսանկարները չեն ունենալու բացատրագրեր, այցելուներն իրենք պետք է փորձեն ճշգրտել, թե լուսանկարում Երևանի որ հատվածն է ներկայացված»:

«Էրեբունի» պատմահնագիտական  արգելոց-թանգարանի բացօթյա ցուցասրահում երևանյան չորս թանգարանի համատեղ ծրագիրը մեկնարկելու է ժամը  21:00-ին:

Ա.Սարգսյանը նաև տեղեկացրեց, որև Երևանի պատմության թանգարանում կայանալու է 17-19-րդ դդ. չորս ցուցանմուշի շնորհանդես. Սարդարի պալատի 17-18-րդ դարերով թվագրվող մարմարե շատրվանը, Երևանի հին շուկայի կշեռքը և Երևանի հին ժամացույցը՝ 19-րդ դար, Երևանի հին բնակարանների վիտրաժները՝ 18-19-րդ դդ: Բոլոր չորս ցուցանմուշը, ըստ նրա, գտնվել են իրենց թանգարանի հավաքածուում, բայց առաջին անգամ են ցուցադրվելու: Բոլորը բնօրինակներն են:

Ա.Սարգսյանի խոսքով, մշակութային այդ ակցիաների համար թանգարանները մշակում են հատուկ ծրագրեր, որոնք հետաքրքրություն առաջացնեն այցելուների շրջանում՝ հնարավորություն ընձեռելով  այցելուներին  իրենք ընտրություն կատարել, թե որ թանգարան գնալ:

Հիշեցնենք, որ 1977 թվականից ի վեր մայիսի 18-ը՝ «Թանգարանների միջազգային օրը» համախմբում է աշխարհի 5 մայրցամաքների, ավելի քան 30 հազար թանգարանների` կոչ անելով տարվա համար առաջարկված թեմայի շրջանակում հանդես գալ հատուկ միջոցառումներով ու նախաձեռնություններով: Յուրաքանչյուր տարի առաջադրվում է օրվա խորհրդին առնչվող որևէ յուրահատուկ թեմա, ինչը հնարավորություն է տալիս շեշտելու թանգարանների գործունեության բազմազանությունը: Այս տարվա կարգախոսն է` «Թանգարանները և մշակութային լանդշաֆտները»:

«Թանգարանների գիշեր» միջոցառումը Հայաստանում անցկացվում է մայիսի 21-ին: Այն իրականացվում է Մշակութային ժառանգության պահպանության բնագավառում ամենահին միջազգային կազմակերպություններից մեկի` Թանգարանների  միջազգային  խորհրդի  /ԻԿՕՄ/ առաջարկով: 

Հայաստանում և Արցախում  գործող շուրջ 112 թանգարան միացել են այս միջոցառումներին:
Մայիսի 18-ին թանգարանների մուտքն անվճար է լինելու ժամը 10:00-18:00-ն, մայիսի 21-ին՝ ժամը 18:00-24:00-ն: