Ձեր վստահելի աղբյուրը

Դիլիջանում գտնվող ուսումնական կենտրոնի մասին հետաքննող լրագրողների հրապարակումներից ԱԺ պատգամավոր Նաիրա Զոհրաբյանը եզրակացրել է. «Չգիտես՝ հանգստի օբյե՞կտ է, զոնա՞ է՝ իր սաունաներով, թանկանոց սիգարների սենյակով»:

Այսօր Ազգային ժողովում Վերահսկիչ պալատի 2015 թվականի գործունեության ծրագրի քննարկման ժամանակ պատգամավորը Վերահսկիչ պալատի նախագահից հետաքրքրվեց, թե արդյոք ստուգումներ անցկացրե՞լ են այդ կառույցում և արդյոք հայտնաբերե՞լ խախտումներ:

«Կոնկրետ ձեր կառույցը էդտեղ վերահսկողություն իրականացրե՞լ է, որ հասկանանք՝ ինչու պետք է նախարարությունը Դիլիջանում հանգստի, ռելաքսի զոնա ունենա նման ճոխ ատրիբուտիկաներով», -հավելեց պատգամավորը:

ՎՊ նախագահ Իշխան Զաքարյանը տեղեկացրեց, որ իր ղեկավարած կառույցը ստուգումներ չի անցկացրել Դիլիջանի ուսումնական կենտրոն ՊՈԱԿ-ում, քանի որ գործունեության ծրագրում նման բան նախատեսված չի եղել: Իսկ ինչ վերաբերում է 2016-ի ծրագրերին, ապա այն հաստատում է ՎՊ խորհուրդը:

Նկատենք, որ մարտի 31-ին կառավարության որոշմամբ, ֆինանսների նախարարության Դիլիջանի ուսումնական կենտրոնի կառավարման լիազորությունները փոխանցվել էին կառավարությանն առընթեր պետական եկամուտների կոմիտեին: Այս կենտրոնում ծախսված հսկայական գումարների մասին գրել էր մամուլը:

Մասնավորապես, նշվել էր, որ ուսումնական կենտրոնի լոգասենյակները կհանդերձավորվեն «լյուքս» դասի հյուրանոցներին վայել օճառամաններով, հայելիներով ու աղբամաններով: Նախարությունն այդ նպատակով պետբյուջեից 37 միլիոն դրամ է վճարել «Իդեալ» ու «Կերամիկա» խանութների ցանցը ներկայացնող «Իմեքս գրուպ» ընկերությանը: Նաև նշվել էր, որ բյուջեից 3 միլիոն 700 հազար դրամ է վճարվել 95 հատ խոշորացույցով հայելի գնելու համար, յուրաքանչյուրը՝ 39 հազար դրամով, 2 միլիոն 742 հազար դրամ ծախսվել է աղբամանների վրա, յուրաքանչյուրը՝ շուրջ 13 հազար դրամ արժողությամբ: