Բացահայտվել է 40-ամյա տղամարդու սպանությունը

Իրավունք 09:00 17/05/2016 Հայաստան

Բացահայտվել է 40-ամյա տղամարդու սպանությունը

ՀՀ քննչական կոմիտեի Շիրակի մարզային քննչական վարչությունում քննվող քրեական գործով պարզվել են Գյումրիում 40-ամյա տղամարդու սպանության հանգամանքները, առերևույթ հանցագործություն կատարած անձի ինքնությունը։ Այս մասին հայտնում են ՀՀ քննչական կոմիտեի դեպարտամենտի տեղեկատվության և հասարակայնության հետ կապերի բաժնից:

2016 թվականի մայիսի 14-ին՝ ժամը 22:50-ին, «Գյումրու բժշկական կենտրոն» ՓԲԸ-ից ահազանգ է ստացվել առ այն, որ կրծքավանդակի ձախ կեսի առաջնային պատի, աջ կեսի կողմնային պատի հրազենային վիրավորում և աջ ազդրի վերքով իրենց մոտ է տեղափոխվել 40-ամյա Գուրգեն Ավետիսյանի դին:

Դեպքի առթիվ ՀՀ քննչական կոմիտեի Շիրակի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 104-րդ հոդվածի 1-ին մասով և 235-րդ հոդվածի 1-ին մասով:
Ձեռնարկված անհետաձգելի գործողությունների արդյունքում պարզվել է դեպքի վայրը, որի զննությամբ հայտնաբերվել են քրեական գործով էական նշանակություն ունեցող մի շարք առարկաներ, վերցվել փորձանմուշներ։ Պարզվել է նաև առերևույթ հանցագործություն կատարած անձի ինքնությունը, ով մայիսի 15-ին ձերբակալվել է և հարցաքննվել։ Վերջինիս մասնակցությամբ կատարվել է քննչական փորձարարություն, որի ժամանակ կասկածյալը մանրամասն ցուցմունք է տվել դեպքի շուրջ։

Առգրավվել են կասկածյալի այն հագուստները, որոնք նա կրել է դեպքի պահին, վերցվել անհրաժեշտ փորձանմուշներ և նշանակվել են փորձաքննություններ՝ քրեական գործով էական նշանակություն ունեցող հանգամանքները պարզելու համար։
Նախաքննությունը շարունակվում է:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: