Ձեր վստահելի աղբյուրը

Հայաստանի նախագահի առաջարկը՝ այս փուլում հետաքննության մեխանիզմների ներդրման վերաբերյալ Վիեննայում ընդունվեց: Այդ մասին այսօր լրագրողների հետ ճեպազրույցում հայտարարեց ԱԺ փոխնախագահ, ՀՀԿ մամուլի խոսնակ Էդուարդ Շարմազանովը:

Նա հետևել է Վիեննայում տեղի ունեցած նախագահ Սարգսյանի հանդիպումներին, դրանից հետո հնչած հայտարարություններին և եզրակացրել, որ Սերժ Սարգսյանի բոլոր առաջարկներն այնտեղ ընդունվել են:

«Ադրբեջանի նպատակը՝ զինադադարը խախտել, նոր զինադադար պարտադրել, նոր զիջումներ կորզել, նոր քաղաքական փաստաթուղթ ի հայտ բերել, չիրականացավ: Այս հայտարարությունը ցույց է տալիս, որ ԵԱՀԿ Մինսկի խմբի համանախագահ երկրների արտգործնախարարները ընդունել են պաշտոնական Երևանի առաջարկները և ունեին նույն տեսլականը, ինչ պաշտոնական Երևանը», -հայտարարեց ՀՀԿ խոսնակը:

Նա հստակեցրեց, որ երեկվա հանդիպումը ընդամենը զինադադարի և խաղի կանոնների վերահաստատում էր և պետք է տեսնել՝ Ադրբեջանը կհետևի՞ այդ կանոններին:

Ինչ վերաբերում է հետագա բանակցություններում Արցախի մասնակցությանը, ապա Շարմազանովը ասաց, որ այդ հարցը հետագա հանդիպումների ժամանակ պարզ կդառնա:

Բայց, նրա խոսքով, մի բան հստակ է՝ «Ղարաբաղը պետք է դառնա բանակցային կողմ»:

Պաշտոնյան նաև եզրակացրել է. «Ադրբեջանը ձախողվեց և ռազմական դաշտում, և երեկ, Վիեննայում: Իսկ հայկական կողմի առաջարկներն ու թեզիսները տեղ են գտել այս հայտարարության մեջ»: