Ձեր վստահելի աղբյուրը

ԵԱՀԿ Մինսկի խմբի համանախագահությունը միահամուռ հայտարարեց, որ բացառում է ռազմական լուծումը և պնդում է, որ կողմերը պետք է վերադառնան հրադադար հայտարարելու մասին 94-95 թթ. Ստորագրած եռակողմ պայմանագրին: Այդ մասին այսօր լրագրողների հետ ճեպազրույցում հայտարարեց ԱԺ պատգամավոր, ՀՀ նախկին արտգործնախարար Ալեքսանդր Արզումանյանը:

«Բավականին դրական ֆոն է ստեղծվում բանակցությունների վերականգնման համար, տալիս է հայկական կողմին հնարավորություն դադար վերցնել ու զբաղվել բանակաշինությամբ, դասեր քաղել անցած օրերին կատարվածից, հետաքննություններ անցկացնել, մեղավորներին պատժել», -հայտարարեց Արզումանյանը:

Արզումանյանը կարծում է, որ նախագահ Սարգսյանի առաջ քաշած երեք նախապայմաններից գոնե երկուսը կատարվել է, իսկ երրորդ և վերջին նախապայմանը, որը վերաբերում էր հասցեական հայտարարություններին, ըստ նրա, ավելի շատ հռետորական էին:

«Հասցեական հայտարարություն բացառվում է միջնորդներից որևէ մեկն անի: Մենք ավելի շատ հասցեական հայտարարություններ պետք է ակնկալենք հարևան, բարեկամ երկրներից», -նկատեց պատգամավորը:

Հիշեցնենք՝ ավելի վաղ հայտարարվել էր, որ Լեռնային Ղարաբաղի հիմնահարցի շուրջ բանակցային գործընթացի վերսկսման համար անհրաժեշտ է երեք կարևոր քայլ՝ վստահության հետաքննության մեխանիզմների ներդրում, հասցեական հայտարարություններ և երաշխիքներ, որ Ադրբեջանը չի գնա նոր ագրեսիայի և ահաբեկչության Լեռնային Ղարաբաղի ժողովրդի նկատմամբ:

ԵԱՀԿ գործող նախագահի անձնական ներկայացուցիչ Անջեյ Կասպշիկին նոր լիազորություններ տալով և դիտորդների քանակը լրացնելով, Արզումանյանի կարծիքով, հնարավոր կլինի «ռեալ ձեռքբերումներ արձանագրել»:

«Մենք պարտավոր ենք երկու բան անել՝ ունենալ ադեկվատ բանակ, որը կպատժի նախահարձակ կողմին, չխուսափել բանակցություններից: Մենք շահագրգռված են խաղաղ կարգավորման: Մենք հարցը լուծել ենք ռազմի դաշտում և հիմա մնում է դա բերել խաղաղության սեղան», -նկատեց պատգամավորը:

Նախկին դիվանագետի կարծիքով, հայկական կողմը պետք է պնդի, որ Լեռնային Ղարաբաղի կարգավիճակը բանակցություններում լինի առաջնային խնդիր: