Ձեր վստահելի աղբյուրը

Վերջին շրջանում Ադրբեջանի ագրեսիայով պայմանավորված իրադարձություններն իրենց հետևանքներն են թողնելու Արցախի հանրապետության տնտեսության և բյուջեի վրա: Արցախի Հանրապետության կառավարության նիստում հայտարարել է վարչապետ Արա Հարությունյանը:

Կառավարության հասարակայնության հետ կապերի վարչության փոխանցմամբ, գործադիր մարմնի ղեկավարն ընդգծել է, որ տեղծված իրավիճակում ծախսերը նախատեսվածից ավելի են արվում մի շարք կարևորագույն  խնդիրների լուծման ուղղությամբ:

Վարչապետի խոսքով, պահուստային ֆոնդից առաջնագծի ամրապնդման և սոցիալական լարվածության թուլացման ուղղությամբ գումարներ են ծախսվել: Աշխատավարձերի փոխհատուցում և դրամական աջակցություն են տրվում առաջնագիծ մեկնած մեր բոլոր հայրենակիցներին: Իսկ գործատու հանդիսացող ընկերություններին առաջարկվելու է արտոնյալ վարկերի տրամադրում՝ իրենց աշխատակից-դիրքապահներին աշխատավարձ տալու նպատակով:

«Այս ամենին զուգահեռ՝ նաև բյուջեի եկամուտների ձևավորման խնդրի առջև ենք կանգնելու՝ վերջին շրջանի ռազմական գործողություններով և խոշոր հարկատու հանդիսացող ընկերությունների չնախատեսված աշխատանքներով  պայմանավորված: Մի կողմից պետք է լրացուցիչ ծախսեր իրագործենք, մյուս կողմից եկամուտների նվազում է տեղի ունենալու: Հետևաբար, պետք է ծախսերը կտրուկ նվազեցնենք»,- նշել է վարչապետը:

Ա. Հարությունյանը գերատեսչությունների ղեկավարներին հանձնարարել մեկամսյա ժամկետում կառավարություն ներկայացնել ծախսերի կրճատման առաջարկություններ: Կրճատումները, սակայն, ըստ Ա. Հարությունյանի, չեն ազդելու այն ծրագրերի վրա, որոնք աշխատատեղեր են ստեղծում: Կառավարության ղեկավարի խոսքով՝ երկրորդ կիսամյակից վերանայվելու է պետբյուջեն և փոփոխություններ կատարելու առաջարկով ներկայացվելու ԱԺ: