Սարգիս Հարությունյան. «Հասկանալով, որ եռագույնը կրկին ծածանվելու է, ադրբեջանցիները դիմեցին այս սադրանքին»

Սպորտ 16:02 17/05/2016

Այսօր «Դիալոգ» մամուլի ակումբում լրագրողների հետ հանդիպեցին Լվովում կայացած Քունգ Ֆուի Եվրոպայի առաջնության ոսկե մեդալակիրներ Աշոտ Հարությունյանը, Հայկ Օհանյանը, Դավիթ Պետրոսյանը, Ալբերտ Թորոսյանը և ֆեդերացիայի նախագահ Սարգիս Հարությունյանը:

Հիշեցնենք, որ մայիսի 13-ին հայ և ադրբեջանցի մարզիկի մենամարտն անավարտ էր մնացել: Հայաստանի հավաքականի անդամ, արցախցի Դավիթ Պետրոսյանին կես քայլ էր բաժանում ադրբեջանցի մարզիկին հաղթելու համար, երբ մրցակցի մարտավկան փորձել է ռինգի կողքից հարվածել Դավթին: Նրան միացել է նաև պարտվողը՝ թիկունքից հարվածելով հայ մարզիկին: Դրանից հետո ադրբեջանական թիմի մարզիչները և մարզիկները նախօրոք դահլիճ բերած մահակներով հարձակվել էին մերոնց վրա և մեծ ծեծկռտուք էր սկսվել, որին միջամտել էին ոստիկանները:

Սարգիս Հարությունյանը տեղեկացրեց, որ ադրբեջանցիների կողմից սա նախապես պատրաստված սցենար էր, որը նրանք պետք է կիրառեին թե հաղթանակի, թե պարտության դեպքում:

«Նման քայլի չէինք սպասում: Իմ կարծիքով` այս ամենը նախապես պլանավորված էր և նրանք պետք է գնային այս քայլին թե հաղթանակի, թե պարտության դեպքում: Հասկանալով, որ պարտվում են և եռագույնը կրկին ծածանվելու է, դիմեցին այս սադրանքին: Հակված եմ, մտածելու, որ սոցցանցերից տեղեկացված են եղել, թե ում եղբայրն է Դավիթը, դրա համար էլ դիմել են այդ քայլին»:

Մենք էլ, իրենք էլ, մինչև Լվով մեկնելը հարցում ենք կատարել անվտանգության հետ կապված, բայց կազմակերպչական առումով թերացել էին: Արդեն դիմել ենք եվրոպական ֆեդերացիային` Ադրբեջանի հավաքականին աշխարհի ֆեդերացիայից դուրս թողնելու համար: Հուսով եմ` կորակազրկեն»,-նշեց Հարությունյանը:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: