Արծվիկ Մինասյանը վստահեցնում է, որ մենաշնորհներ ունեցողների անունները կհրապարակեն
«Ես մոնոպոլիաների դեմ պայքարի թիվ մեկ ջատագովներից եմ և զարմանում եմ, որ ավելի բաց թափանցիկ համագործակցաբար աշխատանքի ոճը դարձավ ևս մեկ քննադատության առարկա»,- այս մասին այսօր լրագրողների հետ զրույցում ասաց ՀՀ էկոնոմիկայի նախարար Արծվիկ Մինասյանն՝ անդրադառնալով լրատվամիջոցներին ուղղված համագործակցության իր կոչին:
«Ես բազմիցս եմ դիմել լրագրողներին, ուզո՞ւմ եք համատեղ աշխատենք, աշխատենք, ուզո՞ւմ եք աջակցե՞ք, աջակցեք բայց մի խանգարեք: Հիմա փոխանակ լրագրողները, լրատվական դաշտը մասնակցեն այս գործընթացին, միավորվում են այն անձանց հետ, ովքեր քաղաքական այս կամ այն շահերից ելնելով փորձում են այս կարևոր գործընթացը նսեմացնել»,-ասաց նախարարը:
Անդրադառնալով ՀԱԿ խմբակցության ղեկավարի այն հայտարարություններին, թե մենաշնորհների դեմ պայքարը Դաշնակցության տասներկու կետերից մեկն էր, ասաց. «Հիմա քաղաքական ուժի ներկայացուցիչ է, ցույց է տվել իր անգործունակությունը, տեսողության և ոչ միայն տեսողության հետ կապված ինքը բազմաթիվ խնդիրներ ունի, բայց ինչ քննադատություն էլ հնչի, ես գնալու եմ առաջ»:
Արծվիկ Մինասյանի դիտարկմամբ` «մենաշնորհ» հասկացությունը տնտեսագիտության մեջ ու օրենքի մակարդակում տարբեր են, հետևաբար, խոսք է գնում արդյունավետ մեխանիզմների ստեղծման մասին, որպեսզի հարցին լուծում տրվի:
«Հանրության շրջանում «մենաշնորհ», «օլիգարխիա» հասակցությունները, որպեսզի տրանսֆորմացնենք ու իրական պայքար տանենք, անհրաժեշտ է ամբողջական համակարգի լիարժեք գործարկում: Ես պատրաստ չեմ սիրողական մակարդակով հայտարությունները դարձնել պետական քաղաքականություն: Ես ասում եմ կատարենք այս գործողությունը, չեք ուզում, մի արեք, ես, միևնույն է, գնալու եմ մենաշնորհների դեմ պայքարի ճանապարհով, իսկ մնացածը... Աստված կպատժի նրանց, ովքեր դեմ են հանդես գալիս իրենց իսկ ցանկություններին»,- ընդգծեց նախարարը:
Անդրադառնալով ՀՀ վարչապետի տված երեքշաբաթյա ժամկետին, որպեսզի մատանշվեն մենաշնորհային ոլորտներն ու գործարարները, Արծվիկ Մինասյանն ասաց, որ ժամանակը բավարար է դա անելու համար, իսկ արդեն դրանց դեմ պայքարի մեխանիզմների մշակման համար ավելի շատ ժամանակ կպահանջվի:
«Մենք չենք կարող հայտարարել, որ մենաշնորհներ կան ու մի կողմ կանգնենք: Հարկավոր է գործողություններ ձեռնարկել, որոնք բազմաթիվ են: Երեք շաբաթը քիչ է մենաշնորհների դեմ պայքար տանելու առումով, բայց բավարար է, որ ճանապարհային քարտեզ մշակենք մենաշնորհային ամբողջ տնտեսական կարգը վերափոխելու, ազատ տնտեսական կարգեր ձևավորելու տեսանկյունից»,- նշեց Արծվիկ Մինասյանը՝ հավելելով, որ արդեն դիմել են ՏՄՊՊՀ-ին ամբողջական տեղեկատվություն ստանալու համար, ակնկալում են նաև միջազգային կազմակեպությունների աջակցությունը:
Ըստ նրա՝ երկար տարիներ աշխատել է խորհրդարանում, սակայն հիմա, երբ նախարար է, հստակ տեսնում է տարբերությունը: «Խորհրդարանում դու կարող ես հիմնվելով տարբեր խոսակցությունների վրա՝ հայտարարություններ անել, գործադիրի ժամանակ այդ հայտարարությունները կյանքի կոչելու մեխանիզմներ է պետք մշակել»,- ասաց Արծվիկ Մինասյանը:
Հարցին, թե մեկ շաբաթվա ընթացքում ինչ-որ արդյունքների հասել են, կարո՞ղ է անուններ հնչեցնել, նախարարը վստահեցրեց, որ զեկույցի տեսքով կծանոթանա մենաշնորհներ վարողների մասին:
«Մի կասկածեք, բոլոր հայտնի անունները, որոնց մասին մտածում եք, բոլորը կլինեն, բայց ես պետք է փաստարկված հիմքերով այդ ամենը ունենամ: Մի սպասեք երբեք, որ ես «ականջահաճո» կամ «ամբոխահաճո» հայտարարություններով կփորձեմ գրավել որոշ մարդկանց սրտերը, հիմա ես ավելի սկզբունքային ու կարևոր եմ համարում երկրի զարգացումն ու առաջընթացն ապահովելը, քան թե ընկնեմ տարբեր քաղաքական ուժերի ու անձանց խոսքերի հետևից»,- ընդգծեց նախարարը:
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
