Ձեր վստահելի աղբյուրը

Ե. Քոչարի անվան թանգարանում  ճարտարապետ և քաղաքաշինարար, համադրող Սարհատ Պետրոսյանը ներկայացրեց  Վենետիկի 15-րդ միջազգային ճարտարապետական բիենալեում Հայաստանի ազգային տաղավարի ցուցադրության հայեցակարգը: Հայաստանի տաղավարի պաշտոնական բացումը կայանալու է մայիսի 26-ին, տեղակայված է  Վենետիկի Հայկական փողոցում գտնվող Մխիթարյան միաբանության Սուրբ Խաչ հայկական եկեղեցու գավիթի տարածքում:  Տաղավարի ձևավորման հայեցակարգը հավանության է արժանացել ՀՀ մշակույթի նախարարության կողմից:

Ս. Պետրոսյանի խոսքով, հայկական տաղավարը նվիրված է լինելու Հայաստանի անկախության 25-ամյակին, ներկայացվելու է Հայաստանի հետանկախության շրջանի կենսապատկերային (լանդշաֆտային) քարտեզագրման մի յուրօրինակ լաբորատորիա: 

«Մենք փորձելու ենք յուրովի ամփոփել հետանկախության շրջանի մեր անցած ճանապարհը՝ չկենտրոնանալով միայն ճարտարապետության վրա, այլև ընդլայնելով սահմանները: «Անկախ կենսապատկեր» խորագրի ներքո փորձելու ենք մտորել, հասկանալ, թե վերջին քառորդ դարի ընթացքում Հայաստանի  կենսապատկերն ինչպիսի փոխակերպումների է ենթարկվել՝ այդպես վերարժևորելով անցած ճանապարհը, նաև խորհելու ապագայի մասին»,- ասաց նա:

Ըստ Ս.Պետրոսյանի, տաղավարն իրականում ներկայացնելու է «անկախ կենսապատկեր» (www.independentlandscape.am) կայքի արտապատկերումը: Կենսապատկերի փոխակերպման քարտեզագրման գործընթացը տեղի է ունենալու Հայաստանում աշխատող հինգ թիմի  գործերի հիման վրա: Այսինքն, նրա խոսքով, տաղավարի բացման օրն այցելող մարդիկ մի բան կտեսնեն, նոյեմբերին այցելողները՝ այլ բան:

Հինգ թիմ մինչև նոյեմբեր իրականացնելու է ուսումնասիրություններ, արդյունքները վերբեռնվելու են կայքում և միաժամանակ փոխվելու են նաև ցուցադրության բոլոր լուսանկարները:

«Վիտուալ կապ է ստեղծվելու Հայաստանում դաշտային աշխատանքներ կատարող խմբերի և տաղավարի միջև: Այսինքն՝ ցուցահանդեսի ողջ ընթացքում մի շարք տարբեր գիտակարգեր ներկայացնող հետազոտող խմբեր կփորձեն մեկնաբանել հայկական կենսապատկերի տարբեր բաղադրիչները»,- նշեց Ս.Պետրոսյանը:

Նրա ներկայացմամբ, թեմատիկ հետազոտությունների թեմաներն են.
«Ժողովրդական հրապարակ՝ ներկայացվելու է Ազատության հրապարակի վերջին քառորդ դարում անցած ուղին:

Ներկայացվելու է Գյումրի քաղաքի այն շրջանը, որը կառուցվել է հետերկրաշարժյան ժամանակահատվածում:  Այս թիմի աշխատանքներին մասնակում են նաև Գյումրիի «Թումո» ստեղծած տեխնոլոգիաների կենտրոնի  սաները:

Հայկական գերեզմանները՝ հատկապես ուշադրություն է դարձվելու վերջին 100 տարվա փոխակերպումներին:

Առաջ տրված տները՝ հասկանալու համար, թե հայկական ավանդական տների առաջ տանելն ինչպիսի հետաքրքիր, յուրահատուկ դրսևորումներ կարող են ունենալ:

«Վերանայելով Մեծամորը» ծրագիրը՝ փորձ է արվելու հասկանալ Մեծամոր քաղաքի ֆենոմենը, որը բավականին էական դերակատարում ունի հետանկախության շրջանում»:

«Հինգ հետազոտություններ, որոնք արդեն մեկնարկել են, ավարտվելու են նոյեմբերին: Մենք մեկնարկը տալու ենք երկու ամսվա աշխատանքների արդյունքներով»,- նշեց նա:

«Թումո» ստեղծած տեխնոլոգիաների կենտրոնի փոխտնօրեն Արամ Գյումիշյանը Panorama.am-ի հետ զրույցում նշեց, որ  հայկական տաղավարը ձևավորող պատկերի մեջ կան լուսանկարներ,  որոնք արվել են Գյումրիի կենտրոնի սաների կողմից: Նրանք հատուկ դասընթացներ են անցել:
Ըստ նրա, այս ծրագիրը շատ կարևոր է հենց այդ քաղաքում ապրող երիտասարդների համար, ովքեր նոր աչքով կտեսնեն այդ քաղաքը ու միջավայրը, նաև կգնահատեն այն որպես միջավայր, փաստ՝  վերապրելով այդ ամենը: Նա նշեց, որ շատ կարևոր կրթական բովանդակություն ունի այս ծրագիրը:

Panorama.am-ի հետ զրույցում արվեստաբան Ռուբեն Արևշատյանն ասաց, որ հետաքրքիր նախագիծ է, ակնկալում է, որ հայկական տաղավարը լինելու է ամենահետաքրքիրներից մեկը:
«Այդ հետազոտություններն անդրադառնում են  այն սոցիալական իրողությանը, որը մարմնավորվում է տարբեր ճարտարապետական, քաղաքաշինական դրսևորումներով: Ինձ թվում է, որ դրանք նախ և առաջ հետաքրքիր կերպով ներկայացնելու են հայկական թե իրողությունը, թե ողջ լանդշաֆտը, միաժամանակ ցույց են տալու այդ բարդ կապերը գլոբալ կոնտեքստի հետ»,- ասաց արվեստաբանը:

Վենետիկի բիենալեի 15-րդ միջազգային ճարտարապետական ցուցահանդեսի Հայաստանի տաղավարի հանձնակատարն է ՀՀ մշակույթի նախարարությունը՝ հանձինս Վարդան Կարապետյանի, համադրողն է ճարտարապետ և քաղաքաշինարար Սարհատ Պետրոսյանը:
Տաղավարն իրականացվել է ՀՀ մշակույթի նախարարության, «Պողոսյան» հիմնադրամի, «Ռենկո» ընկերության, բարերար Վահե Գաբրաշի աջակցության շնորհիվ՝ համագործակցելով «Թումո» ստեղծարար տեխնոլոգիական կենտրոնի, Մխիթարյան միաբանության, Իտալիայում Հայաստանի դեսպանության և «Ուրբանլավ Երևանի»-ի հետ:

Նշենք, որ այս տարի Վենետիկի 15-րդ միջազգային ճարտարապետական բիենալեի վերնագիրն է «Հաղորդելով առաջնագծից»: Այն շարունակվելու է մինչև նոյեմբեր, մասնակցելու է տարբեր պետություններ, ճարտարապետական խմբեր ներկայացնող  150 տաղավար: