Կոռուպցիան կախարդական փայտիկով չի վերանա. Հովիկ Աբրահամյան
«Կոռուպցիան բոլոր ժամանակներում եղել է տարբեր աստիճանի: Հիմա մենք ասում ենք՝ եկեք միասին քննարկենք, որոշումներ կայացնենք: Ես բաց ասում եմ ձեզ բոլորին՝ եկեք միասին գործ անենք: Հիմա դուք բոլորդ պատճառներ եք փորձում փնտրել, և այլն, և այլն: Դուք բոլորս գիտեք, որ դա կախարդական փայտիկով չի էլի, որ խփենք ու անենք», -այսօր Ազգային ժողովում կառավարության հետ հարցուպատասխանի ժամանակ հայտարարեց ՀՀ վարչապետ Հովիկ Աբրահամյանը՝ պատասխանելով ԱԺ ՀԱԿ խմբակցության պատգամավոր Արամ Մանուկյանը:
Պատգամավորին հետաքրքրում էր, թե ի՞նչն է պակասում կառավարությանը կոռուպցիայի դեմ ռեալ պայքարելու համար:
«Ես պատկերացնում եմ, որ կոռուպցիայի դեմ պայքարելու համար անհրաժեշտ է կամք, լծակ, լավ օրենք և ինֆոմացիա, թե ինչ է կատարվում քո երկրում: Լրացուցիչ ի՞նչ եք ուզում իմանալ, որ չի ստացվում: Եթե Հայաստանում տասը հարուստ մարդ կա, որը հարստացել է իշխանություն ունենալու, պաշտոն վարելու ժամանակ, առնվազն հինգը այստեղ նստած է», -հարցը հնչեցնելիս հայտարարեց պատգամավորը:
Վարչապետի պնդմամբ, առանց քաղաքացիական հասարակության ներկայացուցիչների, առանց պատգամավորների, կոռուպցիայի դեմ պայքարը չի ստացվի: Աբրահամյանը վստահեցրեց, որ իր հայտարարությամբ քայլեր է ներկայացրել ու շարժվելու են դրանց իրագործման ուղղությամբ:
«Կրճատումներից սկսած, ներկայացուցչական ծախսերից սկսած տնտեսելու ենք ու պարոն Մանուկյան, ձեզ վստահեցնում եմ, որ գնալու ենք կամաց-կամաց առաջ՝ առանց մարդկանց նեղացնելու, առանց ոչ ճիշտ որոշումներ կայացնելու», -հավելեց Հովիկ Աբրահամյանը:
Մանուկյանն իր արձագանքման ժամանակ հստակեցրեց, որ օրինակ, գազի, հոսանքի հետ կապված կոնկրետ դիմումներ են ներկայացվել դատախազություն, բայց արձագանք չկա:
«Այստեղից քանի հայտարարություն եմ արել, բայց զրո արձագանք, հաստափոր հաղորդումներ ենք ներկայացրել, եթե դրանց արձագանք չկա, գամ ձեր հակակոռուպցիոնի նիստին մասնակցեմ, որ ինչ անեմ», -նկատեց պատգամավորը:
Ի պատասխան, վարչապետն ասաց, որ ինքը հավատում է գլխավոր դատախազությանը և հնարավոր չէ, որ առանց հիմքեր քրեական գործեր կարճվեն:
«Դատախազության նպատակը որն է, դիմի ռիսկի, վերցնի ու քրեական գործը կարճի: Մենք կաշկանդված չենք որև գործ թաքցնելու համար», -նշեց վարչապետը:
Նաև դիմելով պատգամավորին ասաց, որ ինքը բաց է, կոծկելու որևէ խնդիր չունի ու հորդորեց աշխատել միասին:
Հարակից հրապարակումներ`
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
