Ձեր վստահելի աղբյուրը

«Երբ ամենուր մեծ նվիրումով, սիրով ստեղծված, իրենցից արժեք ներկայացնող առարկաներ են, կտավներ, գրքեր, լուսանկարներ, այսինքն արվեստի գործեր, որոնց նայում ես երկար ու չես կարողանում կտրվել, ինքնըստինքյան սկսում ես հպարտություն զգալ, որ քո ազգը նման զավակներ է ունեցել, ովքեր նման անկրկնելի ժառանգություն են թողել հետագա սերունդներին: Այս օրը ևս մեկ հնարավորություն է այցելել թանգարաններ, ուր տիրում է բարին, գեղեցիկը»,- Panorama.am-ի հետ զրույցում ասաց երևանաբան Նաիրա Խաչատրյանը, ով նշեց, որ անպայման թոռնիկներ հետ գնալու է մի քանի թանգարան:

Տիկին Նաիրան հավելեց, որ հաճախ է գնում թանգարաններ, Ազգային պատկերասրահ, որտեղ հանգստություն է գտնում, «մի տեսակ շնչառությունս բացվում է»:

Նշենք, որ այսօր «Թանգարանների միջազգային օր»-ն է:  1977 թվականից ի վեր մայիսի 18-ը՝ «Թանգարանների միջազգային օրը» համախմբում է աշխարհի 5 մայրցամաքների, ավելի քան 30 հազար թանգարանների` կոչ անելով տարվա համար առաջարկված թեմայի շրջանակում հանդես գալ հատուկ միջոցառումներով ու նախաձեռնություններով: Յուրաքանչյուր տարի առաջադրվում է օրվա խորհրդին առնչվող որևէ յուրահատուկ թեմա, ինչը հնարավորություն է տալիս շեշտելու թանգարանների գործունեության բազմազանությունը: Մայիսի 21-ին «Թանգարանային գիշեր» միջոցառումն է: Հայաստանյան և Արցախի ավելի քան 100 թանգարան այս տարի միացել է մշակութային այս ակցիաներին: Այդ օրերին թանգարանները հանդես են գալիս հագեցած ծրագրերով՝ նոր ցուցադրություններ, դասախոսություններով, համերգային, կրթական ծրագրեր: Նպատակը մեկն է՝ բարձրացնել թանգարանների դերը հասարակության սոցիալ-մշակութային կյանքում, ստեղծել նպաստավոր միջավայր՝ թանգարանային առարկաների հանրահռչակման համար: Այսօր  թանգարանների մուտքն անվճար է լինելու ժամը 10:00-18:00-ն, մայիսի 21-ին՝ ժամը 18:00-24:00-ն:

Հայոց լեզվի ուսուցչուհի Գայանե Մինասյանը հաճախ է աշակերտների հետ գնում թանգարաններ. «Ես շատ եմ կարևորում այդ այցելությունները, որոնց ընթացքում երեխաները մոտիկից նախ ծանոթանում են մեր արվեստի  գործերին, նրանց  հեղինակների մասին ինֆորմացիա են ստանում, նաև սկսում են գնահատել գեղեցիկը, հասկանալ, թե որն է իրական արվեստը Այսօր երեխաներն այնքան էլ շատ չեն կարդում գրքեր, հեռուստատեսությամբ բարձր արվեստին վերաբերող հաղորդումները քիչ են, գրեթե բացակայում են: Այսպես նաև փորձում ենք լրացնել այդ բացը: Հաճախ են լինում դեպքեր, երբ, օրինակ, որևէ հերոսի կերպարի հետ ենք ծանոթանում՝ նրա կտավը, նրան վերաբերող իրերը, նրա մասին հետաքրքիր  պատմություններ են լսում, օրեր անց գալիս ու ասում են, որ կարդացել են այն գիրքը, որը տվյալ հերոսի մասին է: Նրանց մոտ հետաքրքրություն է առաջանում»:

21-ամյա Աննան արվեստաբան է: Նրա համար թանգարանը «երկրորդ տուն է դարձել»: «Համալսարանից հետո գնում եմ թանգարան, որտեղ անցկացում եմ օրվա մեծ մասը,  այնուհետև  նոր տուն: Կարծես իմ երկրորդ տունը լինի՝ համալսարանից հետո: Թանգարանում ընկղմվում ես մի աշխարհ,  որը որևէ այլ տեղ չես տեսնի: Այդ աշխարհից դու քեզ հետ տանում ես միայն գեղեցիկը, միայն լավը, միայն բարին: Այդ աշխարհում գտնվելով՝ դու մոռանում ես դրսում գտնվող միապաղաղ, միագույն աշխարհի մասին: Ինձ համար թանգարանը մի վայր է, մի աշխարհ, որտեղ ես ինձ ամենալավն եմ զգում»,- ասաց Աննան: