Ձեր վստահելի աղբյուրը

Այսօր Հայաստանի Վերաքննիչ քրեական դատարանը, դատավոր Ռ. Բարսեղյանի նախագահությամբ, որոշել է գրավի դիմաց ազատ արձակել «Analitik.am»-ի գործով կալանավորված աղջիկներից մեկին՝ Վարդիթեր Գիշյանին: Այդ մասին Panorama.am-ին տեղեկացրեց Գիշյանի փաստաբան Ստեփան Ոսկանյանը:

«Վերաքննիչ դատարան ներկայացված բողոքով խնդրել էի վերացնել առաջին ատյանի դատարանի որոշումը կամ կիրառել այլընտրանքային պատիժ՝ գրավ ու փոխել պաշտպանյալիս խափանման միջոցը: Դատարանը, փաստորեն, որոշեց կիրառել գրավ», -փոխանցեց պարոն Ոսկանյանը:

Գիշյանը ունի մեկ մանկահասակ երեխա և մեղադրվում է ԱԺ պատգամավոր Տիգրան Ուրիխանյանից գումար շորթելու մեջ: Փաստաբանը պնդեց, որ իր պաշտպանյալը չի ընդունում իրեն առաջադրված մեղադրանքը:

Այս գործով կալանավորված մյուս մեղադրյալը Անի Հովհաննիսյանն է, որը շարունակում է մնալ կալանքի տակ:

Քրեական գործն այժմ գտնվում է Հատուկ քննչական ծառայության վարույթում: Ըստ նախաքննության տվյալների, ՀՀ ԱԺ պատգամավորը ոստիկանության կազմակերպված հանցավորության դեմ պայքարի գլխավոր վարչությունում հաղորդում է տվել այն մասին, որ «analitik.am» լրատվական կայքի տնօրենը կայքում պարբերաբար իր անձի, ընտանիքի անդամների, ինչպես նաև իր` որպես ԱԺ պատգամավորի գործունեությանը վերաբերող սուտ տեղեկատվություններ, զրպարտություններ և վարկաբեկիչ այլ նյութեր հրապարակելու կապակցությամբ հանդիպումներ է ունեցել իր հետ, և նմանօրինակ հրապարակումները չդադարեցնելու ու հետագայում նույնաբովանդակ այլ հոդվածներ հրապարակելու սպառնալիքով՝ իրենից պահանջել է յուրաքանչյուր ամիս վճարել 300 հազ. ՀՀ դրամ: