Ձեր վստահելի աղբյուրը

Մոնթեի լուսանկարով բլուզներ, Սասունցի Դավթով՝ վերնաշապիկներ, հայկական գերբով մարզական տարբեր տեսակի հագուստ. սիրիահայ Արամն է առաջարկում երևանյան ցուցահանդեսում:

«Վստահ ասում եմ՝ Երևանի ամենահարմար խանութներից մեկն է», -Panorama.am-ին ասում է Արամը՝ ներկայացնելով շուրջ մեկ տարի առաջ հիմնած #Sport (Հեշթեգսփորթ) խանութում վաճառվող ապրանքը:

Մարզական հագուստի համար տրիկոտաժը ներմուծում են Հայաստան ու հենց իրենց կարի արտադրամասում կարում:

Հպարտանում է՝ 50 աշխատատեղ են բացել՝ մեկը ձևավորում է, մյուսը կարում:

«Ամենապարզ բանը ձեզ ասեմ՝ էս պահի դրությամբ մի հիսուն ընտանիք էս փոքր խանութի պատճառով փող ա ունենում, երիտասարդներ ու տարիքով կանայք աշխատում են, աշխատատեղ ենք ստեղծել, մարդիկ կարող են հանգիստ ապրել, իրանց բյուջեն փող ա մտնում», -ասում է Արամ Պըլըխեանը:

Սիրիայում, մինչև պատերազմը, Արամի ընտանիքը զբաղվել է տրիկոտաժի, հագուստի մեծածախ վաճառքով, ունեցել են 6-7 խանութ: Երկու տարի առաջ, պատերազմի թեժ պահերին, քրոջ հետ միասին Արամը եկել է Հայաստան, ուսումնասիրել շուկան, ծրագրել անելիքը և հետո նրան միացել են հայրն ու մայրը:

Ասում է՝ եկավ Հայաստան, տեսավ, որ այստեղ թուրքական ապրանքը տարածում ունի, նեղսրտեց: Ծրագրեց ու արտադրեց հայկական հագուստ: Այժմ էլ հագուստի տաղավարի շատ տեսանելի հատվածում փակցրել է՝ «Ոչ թուրքական ապրանքին» գրությունը։

««Ոչ թուրքական ապրանքին». Ասում էինք դեռ Սիրիայում: Երբ եկանք Հայաստան, նեղացանք, որ մարդիկ թուրքական ապրանքը գովում են, ասում են՝ սա չինական չի, թուրքական է: Մեզ համար դա իրոք, ահավոր նեղություն ստեղծեց: Սիրիայում այս գործով էինք զբաղվում, ասինք, որ շատ լավ կլինի, որ մենք Երևանում հայկականն անենք, քան թուրքական կամ չինական պատրաստի ապրանք բերենք», -նշում է սիրիահայ երիտասարդը:

Աշխարհում, երբ սիրիացի փախստականները գրեթե ընդունելություն չունեն, Հայաստանում նույն Սիրիայից ապաստանածները արարում են, ծրագրեր կազմում. Արամի առաջիկա ծրագրերում կա ընդլայնել բիզնեսը, նաև արտահանել արտադրանքը Ռուսաստան, Պարսկաստան:

«Նույն ապրանքը, որ կա դրսում, արդեն կարում ենք ստեղ, Երևանում: Սպորտային հագուստ՝ վերև-ներքևը միասին, այսինքն՝ ինչ-որ պետք է ամենօրյա հագնելու համար: Այստեղ կարվում է, ձևվվում է, բոլորը տպվում է մեզ մոտ և հենց մեր խաունթում էլ վաճառվում է», -պատմում է Արամը ու մատնանշում խանութի հասցեն՝ Կողբացի 20/3:

Բիզնեսի հիմնման ճանապարհը դժվար չի եղել, ասում է՝ պատճառն այն է, որ ամեն ինչ օրենքի դաշտում է:

«Խնդիրներ չենք ունեցել, ամեն ինչ օրինական ճանապարհով ենք անում: Դա է ամենաճիշտ ձևը: Եթե մենք օրինական ձևով չանենք, կունենանք խնդիրներ: Ոչ մի գումար վարկով չենք վերցրել, քանի դեռ մենք ունենք հնարավորություն գումար ներդնելու, աշխատելու, վարկը կթողնենք էն մարդկանց, ովքեր չունեն», -ասում է երիտասարդը:

Սիրիա վերադառնալու մասին չի էլ մտածում. «Եթե գնալու մտադրություն ունենայի, մինչև հիմա ստեղ չէի լինի»:

Արամը իր փոքրիկ բիզնեսը ցուցադրում էր «Նոր հեռանկարներ սիրիահայերի համար» ցուցահանդեսում, որի բացման արարողությանը այսօր առավոտյան ներկա է գտնվել նաև ՀՀ նախագահ Սերժ Սարգսյանը:

Ցուցահանդեսը, որին մասնակցում են սիրիական պատերազմի հետևանքով Հայաստան տեղափոխված և գործարարությամբ զբաղվող սիրիահայերի յոթանասունից ավելի ընկերություններ ու անհատ ձեռնարկատերեր, անցկացվում է «Տնտեսական հնարավորությունների շաբաթ» բիզնես համաժողովի շրջանակներում: Պաշտոնական հաղորդագրության համաձայն, հանրապետության նախագահը ծանոթացել է տարբեր ոլորտներում բիզնես գործունեություն ծավալած սիրիահայերի աշխատանքի արդյունքին՝ ցուցահանդեսում ներկայացված արտադրատեսականուն և առաջարկվող ծառայությունների սպառման հնարավորություններին, ընթացիկ խնդիրներին ու զարգացման ծրագրերին: