Ձեր վստահելի աղբյուրը

Մայիսի 13-ին Արցախում հրազենային վիրավորում ստացած Հովհաննես Պողոսյանի առողջական վիճակը այս պահին գնահատվում է ծայրահեղ ծանր: Այս մասին այսօր լրագրողների հետ զրույցում ասաց ՀՀ առողջապահության նախարար Արմեն Մուրադյանը:

Ինչ վերաբերում է մարտական դիրքերում վիրավորված 19-ամյա Արման Լազգիյանի արտերկիր տեղափոխման հարցին,  նախարարն ասաց, որ երեկ «Էրեբունի» բժշկական կենտրոնում նրան վիրահատել են, Արմանի առողջական վիճակում երեկվանից նկատվում է աննշան դրական դինամիկա: «Այս պահին Արմանի առողջական վիճակը գնահատվում է կայուն ծանր և նրան արտերկիր տեղափոխելու մասին խոսելը վաղ է, այս հարցը օրակարգից հիմա հանել ենք: Հետվիրահատական շրջանն անցնելուց  հետո  միայն կկարողանանք տեղափոխման մասին խոսել»,- նշեց Արմեն Մուրադյանը՝ հավելելով, որ Արմանի ծնողների հետ հանդիպել է և ասել, որ այս պահին անհնար է տեղափոխել:

Նախարարը միաժամանակ ասաց, որ Ռուբեն Առաքելյանի և Արման Լազգիյանի ծնողների ցանկությունը հստակ է՝ որդիների հետագա վերականգնողական բուժումը շարունակել այն կլինիկաներում, որտեղ իրենք են ցանկանում :

«Ես խոսել են վարչապետի հետ, մենք պատրաստակամ ենք և մեր բարոյական պարտքն ենք համարում մշտապես լինել մեր տղաների կողքին»,- ընդգծեց առողջապահության նախարարը:

Ինչ վերաբերում է հոսպիտալում գտնվող վիրավոր զինծառայողների առողջական վիճակին, Արմեն Մուրադյանը նշեց, որ այս պահին ծայրահեղ ծանր գնահատվում է Հովհաննես Պողոսյանի վիճակը, իսկ 6 զինծառայողի առողջական վիճակը՝ կայուն ծանր: