Ձեր վստահելի աղբյուրը

Կոտայքի մարզի երկու գյուղերի՝ Գառնիի ու Գողթի բնակիչներն այսօր էլ բողոքի են դուրս եկել՝ «Ազատություն Ազատ գետին», «Դուրս հանեք ինժիներական տեխնիկան», «Ձեռքներդ հեռու Ազատ և Գեղարդ գետերից» այս ու այլ գրություններով ցուցապաստառներով:

«Անժամկետ բողոքի ակցիա է: Ակցիան կշարունակենք այնքան ժամանակ, քանի դեռ չեղյալ չեն համարվել Ազատ գետից Քաղցրաշեն գյուղ ջուր տանելու, ինչպես նաև Գեղարդալճի ծրագրերը»,-հայտարարեցին գյուղացիները:

Նրանք պահանջում են գետի կիրճից ժամ առաջ հանել տեխնիկան, քանի դեռ չեն հանել, ասում են՝ տուն չենք գնալու:

Գյուղացիները պատմում են, որ արդեն երեք օր ավելի մեծ թվով տեխնիկա են բերել,  ավելի մեծ թափով են աշխատանքներն իրականացվում. «Քանդելով գնում են, բնությունը քանդում են»:

Գյուղացիները մտահոգված են: Գետի ջուրը կրճատելու հետևանքով արոտավայրերն ու այգիները կչորանան: Համայնքի բնակիչները հպարտությամբ նշում են՝ իրենց գյուղը մեծությամբ երրորդն է, բայց անմիջապես վրա բերում՝ մեր բողոքները լսող չկա:

Նրանց պահանջը մեկն է «Փրկենք Ազատ գետը»: Ակցիայի մասնակիցներից մեկը՝ Գառնիի բնակչուհի Արուսյակ Այվազյանը պատմեց, որ սկսել են գյուղացիներին վախեցնել:

Ա. Այվազյանը պատմեց, որ մի քանի օր առաջ երեք թիկնեղ տղամարդ այցելել են իր դեղատուն, հարցրել հարկային թղթերից,  հետո ասել են, թե իբր իր տղան չի ծառայել բանակում: Կինն ասել է, որ իր դեղատանն ամեն ինչ հարկային օրենսդրության պահանջներին  համապատասխան է իրականացվում, իսկ որդին էլ ծառայել է:

«Ասեցի, եթե դեղ եք գնում, գնեք, թե չէ դուրս եկեք: Ես ասացի կահազանգեմ ոստիկանություն, դուրս եկան ու գնացին: Բայց ես հասցրեցի մեքենայի համարները նայել»,-ասաց Ա. Այվազյանը: Նա մտածում է, որ իրեն փորձում են վախեցնել՝ բողոքի ակցիաներին ակտիվություն չցուցաբերելու նպատակով: