Ձեր վստահելի աղբյուրը

Երվանդ Քոչարի թանագարանը «Թանգարանների գիշեր» ծրագրին միացել է «Քոչարի ոգու ասպետները» խորագրով միջոցառմամբ: Panorama.am-ի հետ զրույցում թանգարանի տնօրեն Կարինե Քոչարնն ասաց, որ  երբ 1936 թվականին Քոչարը Փարիզից վերադառնում է Երևան, հայտնվում է մի միջավայրում, որտեղ անտեսվում էր ազգային ամեն ինչ, բայց քանի որ Ներսիսյան դպրոցում շատ հայեցի կրթություն էր ստացել, գիտեր, որ ազգերին բնաջնջում են նախ և առաջ նրանց զրկելով հոգևոր, մշակութային արմատներից:

«Քոչարը մեծ ներդրում ունեցավ հայ արվեստում: Երևանյան շրջանի աշխատանքները նվիրված էին հիմնականում հայ ժողովրդի անցյալի, ներկայի, ապագայի հերոսներին: Կարճ տեսահոլովակի միջոցով մենք ներկայացնելու ենք  քոչարյան ոգու ասպետները, որոնք մինչ այժմ էլ շարունակում են իրենց առաքելությունն իրականացնել և դա կանեն դեռևս երկար ժամանակ»,- ասաց թանգարանի տնօրենը:

«Քոչարի ոգու ասպետները. Սասունցի  Դավիթ և Վարդան Մամիկոնյան»  հեղինակային էքսկուրսիա և կինոդիտումը կսկսվի ժամը 18:30-ից:

«Թանգարանների գիշեր» միջոցառումն իրականացվում է Մշակութային ժառանգության պահպանության բնագավառում ամենահին միջազգային կազմակերպություններից մեկի` Թանգարանների  միջազգային  խորհրդի  /ԻԿՕՄ/ առաջարկով: Գարնանային ակցիային  այս տարի մասնակցում է Հայաստանում և Արցախում գործող շուրջ 112 թանգարան: Ժամը 18:00-24:00-ն թանգարաններն  անվճար են:  Այսօր թանգարաններում իրականացվելու են բազմաբովանդակ և յուրահատուկ միջոցառումներ:

«Թանգարանների գիշեր» միջոցառման նպատակն է վերարժևորել մշակութային ժառանգությունը, թանգարանային միջավայրում համադրել արվեստի ուղղություններն ու ապահովել մշակութային ջերմ մթնոլորտ: