Ձեր վստահելի աղբյուրը

Կեսգիշերին մոտ Շիրակի մարզի Գյումրի քաղաքի Երևանյան խճուղում «Ֆորդ տրանզիտ» մարդատար միկրոավտոբուսը դուրս է եկել ճանապարհի երթևեկելի մասից և հարվածել սյանը:

ԱԻն արտակարգ ալիք լրատվական կենտրոնից հայտնում են, որ ուղևորներից մեկը՝ ծնվ.1960թ. ծնված Տ. Խ.-ն  հիվանդանոց տեղափոխելու ճանապրհին մահացել է:

Վարորդ Ա. Դ.-ն (ծնվ.1989թ.), ուղևորներ Ա. Խ.-ն (ծնվ.1973թ.), Ա. Ս.-ն (ծնվ.1977թ.), Ս. Հ.-ն (ծնվ.1977թ.), Ա. Խ.-ն (ծնվ.1960թ.), Է. Հ.-ն (ծնվ.1988թ.), Ա. (ծնվ.1979թ.) և Ա. (ծնվ.1984թ.) տեղափոխվել են Գյումրի քաղաքի ԲԿ:

Գյումրիի ԲԿ-ի բուժական գծով փոխտնօրեն Արմեն Խաչատրյանը Panorama.am-ին հայտնեց, որ տուժածներից երեքը գիշերվա ընթացքում վիրահատվել են: Երկուսի մոտ ուղղվել են հոդախախտումները: Վիրահատության միջոցով կարողացել են վերականգնել մի քաղաքացու ոտքի ամբողջականությունը՝ վերջույթը գրեթե ամպուտացված է եղել:

«Այս պահին ունենք միջին ծանրության և ծանր կայուն վիճակում գտնվող հիվանդներ: Չորսը վերակենդանացման բաժանմունքում են, չորսը՝  վնասվածքաբանական բաժանմունքում»,-ասաց նա:

Բժշկական կենտրոնի փոխտնօրենի խոսքով, այս պահին հետազոտությունները շարունակվում են, ստանում են բուժումներ:

«Ֆորդ տրանզիտ» մակնիշի մարդատար ավտոմեքենայի՝ սյանը հարվածելու հանգամանքները դեռ պարզված չեն: