Ձեր վստահելի աղբյուրը

Արցախի Թալիշ գյուղում այժմ իրավիճակը անվտանգ է, և համապատասխան պայմաններ պետք է ստեղծվեն, որ մարդիկ վերադառնան իրենց բնակավայր: Այդ մասին այսօր Ազգային ժողովում պատասխանելով լրագրողների հարցերին հայտարարեց ՀՀ Պաշտպանության նախարար Սեյրան Օհանյանը

Հարցին, թե տեղահանված բնակիչները կարո՞ղ են վերադառնալ իրենց գյուղ, Օհանյանը պատասխանեց, որ այդ հարցը պետք է ուղղել ԼՂՀ իշխանություններին:

«Պաշտպանության բանակը այնտեղ ծառայություն է իրականացնում, կրակոցները քիչ են, և այդ ամենը ԼՂՀ ղեկավարությանը հնարավորություն է ստեղծում աշխատել, պայամններ ստեղծել բոլոր տիպի ավերվածությունից հետո, որ ժողովուրդը վերադառնա», -հավելեց Օհանյանը:

Անդրադառնալով ղարաբաղաադրբեջանական շփման գոտում տիրող իրավիճակին, նախարար Օհանյանն ասաց, որ այս օրերին հրադադարի ռեժիմը հարաբերականորեն պահպանվում է: Նրա խոսքով, կրակոցների թիվը նվազել է:

«Կարծում եմ, որ Պաշտպանության բանակի ողջ անձնակազմը, Հայաստանի սահմանին կանգնած զինծառայողները, զորամիավորումները տիրապետում են իրավիճակին: Ես եղել եմ Ղարաբաղում, անցել եմ սահմանով, տեսել, որ մարտական ոգին, տրամադրվածությունը, մարտական կարողությունների բարձրացման ուղղությամբ տարվող միջոցառումներն իրականացվում են տեղին»,- հավելեց Սեյրան Օհանյանը: