ԵԱՀԿ ԽՎ հատուկ ներկայացուցիչը Հայաստան և Ադրբեջան այցերի արդյունքում զեկույց է պատրաստելու

Քաղաքական 11:04 24/05/2016

ԵԱՀԿ ԽՎ հատուկ ներկայացուցիչը Հայաստան և Ադրբեջան այցերի արդյունքում զեկույց է պատրաստելու

ԱԺ փոխնախագահ Էդուարդ Շարմազանովը Երևանում ԵԱՀԿ ԽՎ-ի Հարավային Կովկասի հարցերով հատուկ ներկայացուցիչ Քրիստիան Վիգենինին է փոխանցել Արցախում ադրբեջանական զինուժի վայրագություններն ապացուցող փաստեր, որոնց մի մասը տեղ է գտել Բաքվի պետական համալսարանի կայքէջում:

«Ադրբեջանական ագրեսիայի դրսևորումներում կարելի է տեսնել «Իսլամական պետության» ձեռագիրը»,-ասել է Շարմազանովը ԵԱՀԿ ներկայացուցչին:

ԱԺ հասարակայնության հետ կապերի վարչության փոխանցմամբ, ԱԺ փոխնախագահը նշել է, որ Ադրբեջանին անթաքույց կերպով և բարձր մակարդակով իր աջակցությունն է հայտնել Թուրքիան, որն արդեն 23 տարի շրջափակման մեջ է պահում Հայաստանը:

ԼՂ խնդրի կարգավորման համատեքստում Էդուարդ Շարմազանովը մտահոգիչ է համարել միջազգային հանրության կողմից հնչող անհասցե կոչերը. այս հարցում նա կարևորել է առանցքային դերակատարություն ունեցող ԵԱՀԿ-ի հասցեական գնահատականները:

«Լեռնային Ղարաբաղը երբեք չի եղել Ադրբեջանի կազմում. նա դուրս է եկել ԽՍՀՄ կազմից, իսկ ղարաբաղցիներն ընդամենն իրացրել են ինքնորոշման իրենց իրավունքն այնպես, ինչպես աշխարհի շատ այլ ժողովուրդներ»,- ասել է ՀՀ ԱԺ փոխնախագահը: Նա հավելել է, որ բանակցությունների ընթացքում առանց Լեռնային Ղարաբաղի մասնակցության՝ հնարավոր չէ հասնել հակամարտության կարգավորմանը:

Քրիստիան Վիգենինն անհրաժեշտ է համարել տարածաշրջանում խաղաղության հաստատմանն ուղղված առավել մեծ ջանքերի գործադրումը՝ առանց վիճարկելու ԵԱՀԿ Մինսկի խմբի մանդատը:

ԵԱՀԿ ԽՎ Հարավային Կովկասի հարցերով հատուկ ներկայացուցիչը տեղեկացրել է, որ Հայաստան և Ադրբեջան կատարած այցերի արդյունքում պատրաստելու է զեկույց, որը ներկայացնելու է առաջիկայում Թբիլիսիում կայանալիք ԵԱՀԿ խորհրդարանական վեհաժողովի տարեկան նստաշրջանին:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: