Ձեր վստահելի աղբյուրը

Երևանի ավագանու այսօրվա նիստում ընդունոց որոշումներով բնակարններ նվիրեցին ապրիլյան պատերազմում զոհված երևանաբնակ երեք զինծառայողների ընտանիքներին:

Ավելի վաղ ԶԼՄ հրապարակումներից հայտնի էր դարձել, որ  ապրիլի 5-ին Մարտակերտի շրջանում տեղի ունեցած ռազմական գործողությունների ժամանակ զոհված 2-րդ կարգի զին. հաշմանդամ, կամավորական Սարգիս Խալաֆյանի,  ապրիլի 8-ին Մարտակերտի շրջանում տեղի ունեցած ռազմական գործողությունների ժամանակ զոհված պայմանագրային զինծառայող Հրաչյա Մուրադյանի և  ապրիլի 14-ին Մարտունու շրջանում տեղի ունեցած ռազմական գործողությունների ժամանակ զոհված ժամկետային զինծառայող Մանվել Գևորգյանի ընտանիքները բնակարան չունեն: Երեք ընտանիքներն էլ Երևանի տարբեր հատվածներում վարձով էին բնակվում:

Հրաչ Մուրադյանի կնոջն ու երեք երեխաներին,  ավագանու որոշմամբ,  նվիրել են  85.16 քմ մակերեսով բնակարան  Քանաքեռ 14-րդ փողոցում: Նույն փողոցի մեկ այլ շենքում 85.16 քմ մակերեսով բնակարան են նվիրել  Սարգիս Խալաֆյանի կնոջն ու երեք զավակներին:

Մանվել Գևորգյանի ընտանիքին՝ հորը, մորը, քրոջը նվիրել են  Լյուքսեմբուրգի փողոցում գտնվող  60.63 քմ մակերեսով բնակարան: