Բանդոնեոնահար Կարլոս Բուոնոն տանգոյի ռիթմի և հայկական երաժշտության միջև նմանություններ է տեսնում
Մի օծանելիքի բուրմունք…:
Ահա թե ինչն է պատճառ դարձել, որ արգենտինացի Կարլոս Բուոնոն ընտրել է բանդոնեոնահարի մասնագիտությունը, և այսօր տարեկան հարյուրից ավելի համերգներ է ունենում աշխարհի տարբեր երկրներում: Այսօր նա Հայաստանում է, Հայաստանի Ազգային Ֆիլհարմոնիկ նվագախմբի լարային կազմի, արգենտինացի դաշնակահար Ալդո Սարալեգիի հետ ելույթ է ունենալու մայիսի 27-ին Արամ Խաչատրյան համերգասրահում Արգենտինական տանգոյի երաժշտության և պարերի երեկոյին:
Լրագրողների հետ հանդիպման ժամանակ երաժիշտը պատմեց. «Վեց տարեկան էի, միշտ հայրիկիս հետ դուրս էինք գալիս ու նստում մեր տան շեմին: Միշտ մի պարոն էր անցնում մեր կողքով: Նա բարևում էր հայրիկիս ու շարունակում ճանապարհը: Առաջինը քթիս հասնում էր նրա օծանելիքի բուրմունքը: Ձեռքին մշտապես մի տուփ էր լինում: Ենթադրում էի, որ մեջը պետք է օծանելիք լինի: Մի օր հայրս տարավ միջոցառման: Նվագախումբը տեղավորվեց: Հետո բեմ բարձրացավ այդ պարոնը՝ ձեռքին նույն տուփը: Բացեց և միջից հանեց բանդոնեոնը»:
Խոսելով արգենտինական տանգոյի մասին, նա նշեց, որ այն տարբեր մշակույթների խառնուրդ է: «Արգենտինական տանգոյի ուժը, հզորությունը, կենսունակությունն իր ակունքների մեջ է: Միակ պարն է, որ մեծ մտերմություն է հաստատում կնոջ և տղամարդու միջև: Պարողները հենց պարի ընթացքում շատ լավ հասկանում են՝ կլինի այդ մտերմությունը, թե ոչ»:
Կարլոս Բուոնոն ասաց, որ իր ընտանիքում չեն սիրում տանգո. «Առավոտյան նվագում եմ տանգո, օրվա երկրորդ կեսին լսում եմ տանգոն, երեկոյան արդեն անցնում եմ փորձերի: Իմ ընտանիքն ինձ շատ է օգնում, բայց արդեն բավական է այդքան տանգոն»:
Նա չի պարում տանգո. «Արգենտինայում մի ասացվածք կա. «Նա, ով նվագում է, չի պարում»»:
Ասուլիսին ներկա ՀՀ-ում Արգենտինայի արտակարգ և լիազոր դեսպան Գոնզալո Ուրրիոլաբեիտիան ասաց, որ ինքը մի քիչ պարում է, բայց պարելիս մշտապես վիճում է կնոջ հետ:
Պատասխանելով հարցին, թե ինչո՞վ գրավեց տանգոն ամբողջ Եվրոպան, դեսպանը մի քանի պատճառ նշեց. «Իմ կարծիքով՝ տանգոյի երաժշտությունն ամենաինտելեկտուալն է, միշտ նվագախումբ կա: Դրա մեջ կա նաև պոպուլյար երաժշտության էլեմենտները: Գուցե Եվրոպայում տարածվելու պատճառներից մեկն այն է, որ տանգոն շոպենյան հիմք ունի»:
Կարլոս Բուոնոն համաձայնվեց դեսպանի հետ: Ըստ նրա, տանգոյի տարածմանը նպաստել են նաև Աստոր Պիացոլլայի մշակումները:
Երաժիշտը տանգոյի և հայկական երաժշտության միջև նմանություններ է տեսնում. «Հայկական երաժշտությունը ռիթմի առումով հարուստ է: Պիացոլլայի երաժշտության ռիթմը մենք ասում ենք՝ 3-3-2: Հայկական երաժշտությունը շատ նման է այս ռիթմին»:
Պատասխանելով հարցին, թե նախքան Հայաստանը գալը ի՞նչ եք իմացել Հայաստանի մասին, Կարլոս Բուոնոն նաև ասաց, որ իր պրոդյուսերը, ով ավելի շատ ընկեր է, հայ է՝ Մանուել Փոլադյան: Բուենոս Այրեսի հայկական թամասում ելույթ է ունեցել: Բանդոնեոնահարին դուրս է գալիս հայկական խոհանոցը:
Նշենք, որ երեկոյի ընթացքում ելույթ են ունենալու պարողներ Արիաննա Կաոիլին (Ավստրալիա), Սուրեն Մխիթարյանը, Արկադի Ատասունցովն, Դիաննա Հայրապետյանն:
Ֆիլիպինյան ծագումով ավստրալացի շախմատիստուհի, ՖԻԴԵ-ի կանանց միջազգային վարպետ Արիաննա Կաոիլին շախմատիստ Լևոն Արոնյանի կինն է: Նա Ավստրալիայի տանգոյի չեմպիոն է եղել: 2006-ից սկսել է զբաղվել պրոֆեսիոնալ պարով: Հայաստանում նա ունի պարային խումբ: Ասուլիսին ներկա Արիաննան ասաց, որ շատ է հուզվում, որ նույն բեմում է լինելու տաղանդավոր բանդոնեոնահար Կարլոս Բուոնոյի հետ: Բնութագրելով տանգոն մեկ բառով, նա ասաց. «Կիրք»:
Արիաննան տեղեկացրեց, որ համերգի ընթացքում երկու տիպի տանգո է ներկայացվելու՝ արգենտինական, որը կապված է հենց կիրքի հետ, մյուսն այլ ոճի է լինելու:
Մայիսի 27-ին կայանալիք համերգի հովանավոր է Կոնվերս բանկը: Բանկի խորհրդի անդամ Խուան Կարլոս Օսկոիդին ասաց, որ երբ Ֆիլհարմոնիկ նվագախմբի ներկայացուցիչները եկան բանկ և ասացին, թե ում են ցանկանում հրավիրել Հայաստան, իրենք միանգամից «այո» են ասել: «Ձեր զգացմունքները կալեկոծվեն: Ներկա եմ եղել երաժշտի համերգներին, մարդիկ արցունքներն աչքերին դուրս են եկել»,- ասաց նա:
ՀՀ-ում Արգենտինայի արտակարգ և լիազոր դեսպանն ասաց, որ իր երկիրն ու Հայաստանը ընկեր պետություններ են, երկար տարիներ ընկերական հարաբերություններ ունեն: Նա հույս ունի, որ այդպես էլ կշարունակվի, կաշխատեն երկու երկրների բարեկամության համար: Առաջիկայում նախատեսում են նաև այլ համերգներ:
Նշենք, որ համերգին հնչելու են Աստոր Պիացոլլայի, Յակոբ Գադեի, Մարիանո Մորեսի, Անխել Վիյոլդոյի, Էդուարդո Արոլասի, Կարլոս Գարդելի, Ագուստին Բարդիի, Ժերարդո Մատոս Ռոդրիգեսի ստեղծագործությունները: Համերգը նվիրվում է հայ-արգենտինական բազմամյա համագործակցությանը:
