Ձեր վստահելի աղբյուրը

Հայաստանի Արտաքին գործերի նախարար Էդվարդ Նալբանդյանը այսօր խորհրդարանում հերքեց տեղեկությունները, թե, Վիեննայից հետո, հունիսին սպասվող Հայաստանի և Ադրբեջանի բարձրաստիճան պաշտոնյաների հանդիպման ժամանակ հնարավոր է ղարաբաղյան հարցի վերաբերյալ համաձայնագիր ընդունվի:

Պատասխանելով հնարավոր համաձայնագրի մասին ԱԺ պատգամավոր Նաիրա Զոհրաբյանի հարցին, արտգործնախարարն ասաց, թե՝ Վիեննայում ԱՄՆ, Ֆրանսիայի և ՌԴ արտգործնախարարների հետ հանդիպման ժամանակ քննարկվել է այն, ինչ հայտարարվել է:

«Եռանախագահ երկրների արտգործնախարարների հայտարարության մեջ հստակ նշված է 94 թվականի զինադադարի պայմանագրի անխտիր իրականացման անհրաժեշտությունը, համաձայնագրում նշվում է զինադադարի խախտման հետաքննության մեխանիզմ ներդնելու մասին, ինչպես նաև խոսվում է ԵԱՀԿ նախագահի անձնական ներկայացուցչի լիազորությունների ընդլայնվելու մասին», -ներկայացրեց արտգործնախարարը:

Անդրադառնալով հաջորդ հանդիպման հնարավորությանը, Նալբանդյանն ասաց, որ հաջորդ հանդիպումը կլինի հունիսին, վայրը դեռ հստակեցված չէ: Այդ հանդիպումը, ըստ նախարարի, նվիրված է լինելու բանակցությունների վերսկսմանը:

«Պարզ է, որ բանակցությունների վերսկսելու համար պետք է համապատասխան պայմաններ ստեղծվեն: Դրանք նախապայմաններ չեն Հայաստանի կողմից, այլ խոսքն այն մասին է, որ պետք է բանակցությունների համար ստեղծվեն պայմաններ:

Եթե այդ պայմանները ստեղծվեն, եթե այդ մեխանիզմները ներդրվեն, եթե ստեղծվի մշտադիտարկման հնարավորությունը, եթե ընլայնվեն ԵԱՀԿ նախագահի անձնական ներկայացուցչի լիազորությունները և այսինքն` բացառվեն նոր զարգացումները, ինչպիսին եղան ապրիլի սկզբին, ապա հնարավոր կլինի սկսել այդ բանակցությունները: Այս պահին ջանքեր են գործադրվում հենց այդ ուղղությամբ», -հայտարարեց Նալբանդյանը:

Այդուհանդերձ, նախարարը տեղեկացրեց, որ հունիսի սկզբին հանդիպում է սպասվում ԵԱՀԿ Մինսկի խմբի համանախագահների հետ: Ըստ նախարարի, այդ հանդիպումները լինելու են առանձին` Ադրբեջանի և Հայաստանի ԱԳ նախարարների հետ:

«Միգուցե այդ հանդիպումների ժամանակ մենք կքննարկենք այն հնարավորությունները, որպեսզի լիակատար իրականացվեն պարտավորությունները, որոնք ձեռք էին բերվել Վիեննայում: Դա հնարավորություն կտա հարթել ճանապարհը դեպի ապագա բանակցությունների փուլ և, ինչու ոչ, հնարավոր է լինի բարձր մակարդակով հանդիպում:

Բացառված չէ, եթե բոլոր նախապայմանները ստեղծվեն և նախապատրաստվի այդպիսի հանդիպման հնարավորությունը, ապա կարող է լինել նաև հանդիպում», -հայտարարեց Հայաստանի արտաքին գերատեսչության ղեկավարը:

Այդ բանակցությունների հիմնական նպատակը, նախարարի փոխանցմամբ, պետք է լինի հիմնախնդրի կարգավորման գլխավոր ուղղությունների մշակումը:

«Ժամանակին մենք դրան անվանում էինք սկզբունքներ, հիմա էլ կարող ենք այդպես ասել, կամ՝ հիմնախնդրի կարգավորման շրջանակային ձևաչափ, որ հնարավոր լինի կողմերի միջև մշակել իրավապայմանագրային այն փաստաթուղթը, որը հնարավորություն կտա կարգավորել հիմնախնդիրը բացառապես խաղաղ ճանապարհով», -հավելեց Էդվարդ Նալբանդյանը: