Ձեր վստահելի աղբյուրը

Արարատի մարզի Արտաշատի տարածաշրջանի մի շարք համայնքների խաղողագործներ  այսօր կրկին իրենց բողոքի ձայնն են բարձրացրել կառավարության շենքի առջև: Նրանք արդեն տևական ժամանակ է «Վինար» ընկերությունից  պահանջում են նախորդ տարվա մթերած խաղողի գումարները, որոնք մինչ օրս չեն ստացել:

Հիշեցնենք, որ օրեր առաջ  Քաղրաշեն համայնքի գյուղացիներն ստիպված ծայրահեղ քայլի էին գնացել.  երեխաներին չէին թույլատրել հաճախել դպրոց՝ այդ կերպ արտահայտելով իրենց դժգոհությունը իրադարձությունների ընթացքից: Այդ ժամանակ Panorama.am-ի հետ զրույցում ՀՀ գյուղատնտեսության փոխնախարար Ռոբերտ Մակարյանն ասել էր, որ մայիսի 19-ին  քաղցրաշենցիների հետ միասին հանդիպել են գործարանի սեփականատիրոջ հետ, վերջինս խոստացել է, որ մեկ-երկու օրվա ընթացքում  գումարները կվճարի:

«Քաղցրաշենում խաղողի մթերումներն իրականացրած «Վինար» ընկերությունը գյուղացիներին խոստացել է վճարել մթերումների դիմաց: Հիմա ընկերության վարկավորումն ընթացքի մեջ է, և խոստացել է շաբաթ օրը վճարումները կատարել: Ես բանկից էլ տեղեկություն ունեմ, որ վարկի տրամադրումն ընթացքի մեջ է, այսինքն՝ մեկ-երկու օրվա խնդիր է»,- նշել էր փոխնախարարը:

Բայց ինչպես տեսնում ենք, գյուղացիներին չեն վճարել և ստիպված այսօր նորից հավաքվել են կառավարության շենքի դիմաց:

Քաղցրաշենցիների խոսքերով՝  իրենց պարբերաբար խոստանում են, որ գումարները կվճարեն, սակայն այդ խոստումներն այդպես էլ իրականություն չեն դառնում: Խաղողագործներից մեկն ասաց, որ դրա պատճառով այգին չի թաղել և այն ցրտահարվել է:

Գյուղացիներից մեկն էլ նշեց, որ այգին պատվել է խոտով, գումար չունի,  որ մշակի:

«Իմ մեկ մանեթը ինձ համար ավելի քաղցր է, քան մյուսների միլիարդները: Մենք գյուղացի մարդ ենք, մենք մեր քրտինքն ենք ուզում, մեր գումարն ենք ուզում»,- ասաց նա՝ հավելելով, որ վարկեր ունի, առողջական խնդիր ունի, բայց չի կարողանում իր գումարները ստանալ, որ այդ հարցերը լուծի:

«Բա էդպես ժողովուրդ կպահե՞ն»,- նշեց նա:

Մեկ այլ քաղցրաշենցի ասաց, որ «Վինար» ընկերությունն իրեն պարտք է 500 հազար դրամ է, խոստացել էին, որ մինչև մայիսի 10-ը գումարները կվճարեն, բայց մինչ օրս ոչ մի գումար չեն տվել: 

«500 հազար դրամի չափով  վարկ ունեմ, ամսի 12-ին մուծման օրն ա, որտեղի՞ց տամ, չունեմ, թող գան տանեն դատեն կամ տունս ձեռիցս վերցնեն: Ամոթ էլ ա ասել՝ հիմա իմ տունը հաց էլ չկա»,- ասաց նա:

«Հայաստանի բոլոր գյուղերում էլ, որ մտնեք հարցնեք, կասեն, որ քաղցրաշենցիները խաղողը հանձնել են, չեն կարողանում գումարը ստանալ: Մենք անընդհատ՝ ամեն հինգշաբթի գալիս ենք էստեղ, որ կառավարությունն էլ իմանա մեր պահանջը: Ոչ մեկից ոչ մի բան չենք ուզում, մենք աշխատել ենք ու մեր գումարն ենք ուզում:  Մեկ կգ խաղողն ընդունել են 40 դրամով, իսկ վարչապետը հայտարարել էր, որ 140 դրամով ընդունեն: Մենք չենք խնդրում, մեր գումարներն ենք պահանջում: Մենք հիմա խաղողը պետք է երկրորդ անգամ բուժում արած լինեինք, գումար չունենք, որ անենք, խաղողը արդեն հասնում ա, ծիրանից հետո խաղող պիտի վաճառենք: Բայց ո՞նց բուժում անենք»,- ասացին գյուղացիները:

Քաղցրաշենցիները նշեցին, որ կառավարության մոտից չեն գնա այնքան ժամանակ, մինչև իրենց գումարները չվճարեն:

Նշենք, որ քիչ առաջ քաղցրաշենցիների հետ հանդիպել է ՀՀ գյուղատնտեսության նախարարի տեղակալ Ռոբերտ Մակարյանը: Նա Panorama.am-ի հետ զրույցում ասաց, որ իրեն բանկից վստահեցրել են՝  ամենաուշը չորեքշաբթի օրը կտրամադրեն «Վինար» ընկերության վարկը և ընկերությունն արդեն իսկ վճարումներ կկատարի: «Ես այդ մասին գյուղացիներին ասել եմ, նրանք ուզում էին հստակ օրն իմանալ և ես նրանց փոխանցեցի այդ տեղեկատվությունը, որ ամենաուշը չորեքշաբթի օրը վարկը պատրաստ կլինի»,- ընդգծեց Ռոբերտ Մակարյանը: