Ձեր վստահելի աղբյուրը

Հայաստանը պատրաստ է եղել ստորագրել Եվրոպական Միության հետ Ասոցացման համաձայնագրի բանակցված մասն այնքանով, որքանով այն չէր հակասի Հայաստանի կողմից ստանձնած պարտավորություններին: Այդ մասին այսօր Ազգային ժողովում 2015թ.-ի պետական բյուջեի կատարողականի ժամանակ հայտարարեց ՀՀ արտաքին գործերի նախարար Էդվարդ Նալբանդյանը՝ արձագանքելով ԱԺ պատգամավոր Նիկոլ Փաշինյանի դիտարկումներին:

Պատգամավորը փորձում էր հասկանալ, թե ինչպե՞ս ստացվեց, որ մեկ օրում Հայաստանը դարձավ Եվրասիական տնտեսական միության անդամ՝ պատճառաբանելով, որ Ասոցացման 4 տարվա բանակցված փաստաթուղթը չի ստորագրվում Հայաստանի և Արցախի անվտանգության երաշխիքներից ելնելով:

«Բայց ապրիլի 2-ին մենք տեսանք, որ անվտանգության ենթադրյալ խնդիրը ոչ միայն չի լուծվել, այլ որոշման արդյունքում ավելի է սրվել»,- հավելեց պատգամավորը:

Նախարար Էդվարդ Նալբանդյանը, սակայն, հակադարձեց.

«Այդպես չի եղել: Ես բազմիցս ասել եմ, նաև այստեղ, այս շենքում՝ փակ ու բաց ձևաչափերով Եվրամիության հետ մեր բանակցությունների մասին, որ մենք պատրաստ ենք եղել բանակցված մասով կնքել համապատասխան համաձայնագիր:

Աշխատանքային խումբ էր ձևավորվել՝ ՀՀ կառավարության ներկայացուցիչների, Մաքսային միությանն անդամակցող պետությունների ներկայացուցիչների կողմից, որի արդյունքում եկանք եզրակացության, որ Հայաստանը կարող  է դառնալ անդամ՝ չնայած խոչընդոտների մասին  խոսակցություններին: Իսկ մենք բազմիցս ասել ենք հրապարակավ, ոչ թե գաղտնի, որ Հայաստանը կցանկանար լինել անդամ, բայց ասում էին՝ անհնար է:

Մենք մեկ օրում չդարձանք: Հայտարարեցինք, որ գնում ենք բանակցելու ու սկսեցինք բանակցել: Հազար էջանոց փաստաթուղթ էր, պետք է բանակցվեր, դա հանկարծակի չէր...։

Ես հայտարարել էի, որ մենք պատրաստ ենք ստորագրել ԵՄ հետ Ասոցացման համաձայնագիրն այնքանով, ինչքանով այն չի հակասում մեր կողմից ստանձնած այլ պարտավորություններին»:

Այժմ է, ըստ ԱԳ նախարարի, Հայաստանը պատրաստ է համագործակցել Եվրոպական միության հետ հետ, բայց ԵՄ-ին անդամակցում է 28 երկիր և պետք է մանդատ տա, որ բանակցությունները սկսվեն:

«Հիմա բանակցությունների 3 փուլ է կայացել: Իհարկե, կարող են լինել հարցեր, ինչպես երեկ Հայաստանում ԵՄ պատվիրակության ղեկավար Սվիտալսկին ասաց, որ կան բարդություններ... Բանակցությունների ժամանակ լինում են խնդիրներ, բարդություններ, որոնք բանակցող կողմերը պետք է փորձեն լուծեն, բայց բանակցությունների ընթացքում չի եղել, որ կողմերից մեկը նման բան հայտարարի:

Եթե Սվիտալսկին կարծում է, որ սա ճնշման ձև է, սխալվում է: Մենք վարում ենք լավ բանակցություններ, մենք գոհ ենք երեք փուլերից, որոնք անցկացվել են: Ժամկետներ չեն դրվել: Բանակցություններից առաջ չենք կարող ասել, թե երբ կավարտվեն դրանք: Բայց մենք կանենք հնարավորինը, որ կարճ ժամկետներում ավարտվեն»,- շեշտեց Էդվարդ Նալբանդյանը:

Նկատենք, որ Հայաստանում ԵՄ դեսպան Պյոտր Սվիտալսկին երեկ լրագրողների հետ զրույցում ասել է, որ Հայաստանի հետ նոր պայմանագրի շուրջ քննարկումներում կան որոշակի բարդություններ:

«Կան բարդ հարցեր, սակայն ես շատ լավատեսորեն եմ տրամադրված, քանի որ ինչպես հայկական կողմում, այնպես էլ եվրոպական կողմում տեսնում եմ դժվարությունները հաղթահարելու կամք», - նշել էր Սվիտալսկին: