Ձեր վստահելի աղբյուրը

Երիտասարդ օպերային երգիչներ Տիգրան Օհանյանը և Քրիստինե Սաֆարյանն ելույթներ են ունեցել տարբեր երկրներում, մասնակցել են տարբեր մրցույթների, արժանացել մրցանակների: Այսօր նրանք իրենց հերթական մրցանակին արժանացան ՀՀ նախագահական նստավայրում:

Տիգրան Օհանյանին և Քրիստինե Սաֆարյանին Հայաստանի Հանրապետության Նախագահի 2015 թվականի երիտասարդական մրցանակ շնորհվեց  «Երգեցողություն» անվանակարգում բարձր կատարողական արվեստի համար:

Panorama.am-ի հետ զրույցում Քրիստինե Սաֆարյանն ասաց, որ այսօր  Հայաստանում կատարողական արվեստին քիչ ուշադրություն է դարձվում. «Պետք է ավելի ակտիվ լինել, հատուկ վերաբերմունք ցուցաբերել: Հասարակությունը վերջին  տարիներին բավականին ակտիվացել է, հաճախում է դասական երաժշտության համերգներին»:

Տ.Օհանյանի խոսքով, ինչպես ամբողջ աշխարհում, այնպես էլ Հայաստանում, այսօր դասական երաժշտությունը, օպերան անկում է ապրում:

«Միշտ էլ այդպես է, լինում է ժամանակաշրջան, որ օպերան անկում է ապրում, հետո նորից ծաղկում է: Հիմա անկման շրջանում է գտնվում, որն այնքան էլ չի ուրախացնում: Օպերան այնպիսի արվեստ է, որ մարդիկ,  լսելով օպերա, պետք է կտրվեն ամեն ինչից, մոռանան իրենց խնդիրները: Բայց երբ տեսնում ենք, որ օպերային թատրոնը, Ֆիլհարմոնիկի դահլիճն այդքան էլ բավարար լցված չեն, ցավալի է մեր ազգի համար: Մենք միշտ եղել ենք մշակութային ազգ»,- ասաց երիտասարդ  օպերային երգիչը: