Եթե տղա ծնվի, իր հերոս հայրիկի անունն է կրելու. Պատմում է պայմանագրային շարքային Գեղամ Մկրտչյանի կինը

Հասարակություն 15:41 28/05/2016 Հայաստան

Եթե տղա ծնվի, իր հերոս հայրիկի անունն է կրելու. Պատմում է պայմանագրային շարքային Գեղամ Մկրտչյանի կինը

Անուշն ու Գեղամը ծանոթացել էին ծառայության ընթացքում: Ամուսնացան, սակայն միասին հասցրեցին ապրել ընդամենը 6 ամիս: Պայմանագրային շարքային Գեղամ Մկրտչյանը (1986-2016 թթ., Մարտակերտի շրջան, գ. Վանք) զոհվեց ապրիլի 3-ին Թալիշի շրջանում՝ այդպես էլ չիմանալով, որ հայր է դառնալու:

Անուշն այդ մասին իմացել է հիվանդանոցում:

«Ապրիլի 3-ին ամուսինս զոհվել է: Ինձ սկզբում չէին ասել: Ասել էին, թե ծանր վիրավորվել է ու տեղափոխել են հիվանդանոց: Ապրիլի 4-ին իմացա այդ մասին: Վատացա, ինձ տեղափոխցին հիվանդանոց, ու այդ ժամանակ իմացա, որ երեխայի եմ սպասում: Սեռը դեռ չգիտեմ: Եթե որդի ունենամ՝ իր հոր անունն է կրելու»,- լրագրողների հետ զրույցում ասաց Անուշ Հյուսնունցը:

Նա նախագահական նստավայր էր եկել ստանալու ամուսնուն հետմահու շնորհված պարգևը:

Գեղամ Մկրտչյանը ծառայել է Մարտակերտում: Ապրիլի սկզբին հակառակորդի կողմից ձեռնարկված ռազմական գործողության ժամանակ նրան տեղափոխում են Թալիշ: 5 տարի էր, որ ծառայության մեջ էր:

«Հայրենասեր, բարի, ընկերասեր էր Գեղամը: Իր հայրենասիրությունն էր դրդում, որ լինել ծառայության մեջ»,- իր ամուսնուն այսպես է նկարագրում Անուշը:

... Ու դժվարանում է խոսել, պատմել ամուսնու մասին: Ձեռքերի մեջ ամուր պահել էր հերոս ամուսնուն շնորհված պարգևը և խոսելու ողջ ընթացքում նայում էր դրան:

Հարակից հրապարակումներ`

Սերժ Սարգսյան. Խոստանում ենք, որ ձեր չարած բարի գործերը մենք անելու ենք կրկնապատկված ջանքով

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: