Ձեր վստահելի աղբյուրը

«Բոլորս պարտավոր ենք նույնիսկ մեր կյանքի գնով պաշտպանել մեր հայրենիքը, անառիկ պահել  սահմանները: Բոլորիս համար ցավալի է, որ մեր ընկերները զոհվում են, բայց յուրաքանչյուրիս  հավերժական պարտքն է ծառայել մեր հայրենիքին»,- լրագրողների հետ զրույցում ասաց Վազգեն Սարգսյանի անվան ռազմական ինստիտուտի կուրսանտ  Ռաֆայել Սարգսյանը:

Նա այն կուրսանտներից  մեկն է, ովքեր իրենց ծառայության ողջ ընթացքում կլինեն զոհված զինծառայողների  ընտանիքների կողքին՝ կապող օղակ  նրանց ընտանիքների և հայկական բանակի միջև: Կուրսանտներին այս գաղափարը հպարտություն է ներշնչում:

Ռաֆայել Սարգսյանը նշեց, որ չգիտի, թե ինչպես իրենց կընդունեն, բայց իրենք սրտանց ուզում են լինել իրենց զոհված ընկերների ընտանիքների կողքին՝ ինչ-որ մի կերպ թեթևացնելու նրանց ցավը:

Նշենք, որ այսօր Հանրապետության տոնի կապակցությամբ ՀՀ Նախագահ Սերժ Սարգսյանը նախագահական նստավայրում 2016 թվականի ընթացքում մարտական և ոչ մարտական պայմաններում զոհված զինծառայողների, կամավորների, աշխարհազորայինների և պահեստազորայինների ընտանիքների անդամներին հանձնել է Հայրենիքի առջև իրենց ծառայողական պարտքը կատարելիս անձնվիրաբար զոհված մերօրյա հերոսներին հետմահու շնորհված պետական բարձրագույն պարգևները:

Միջոցառման ավարտին Հանրապետության Նախագահը դիմել է արարողության մասնակիցներին. «Այս դահլիճում ներկա երիտասարդ զինվորականները Հայաստանի Հանրապետության պաշտպանության նախարարության, Վազգեն Սարգսյանի անվան ռազմական ինստիտուտի և մարշալ Արմենակ Խանփերյանցի անվան ռազմական ավիացիոն ինստիտուտի կուրսանտներ են: Ես հատուկ խնդրել եմ նրանց, որպեսզի գան այս դահլիճ ոչ միայն նրա համար, որ մասնակցեն պարգևատրման արարողությանը, այլ որպեսզի արարողությունից անմիջապես հետո մոտենան, ծանոթանան ձեզ հետ, կապ հաստատեն և իրենց ծառայության ողջ ընթացքում փորձեն լինել ձեր կողքին, ձեր ընտանիքների կողքին, հանդիսանան կապող օղակ ձեր ընտանիքների և հայկական բանակի միջև»: