Ձեր վստահելի աղբյուրը

Տնտեսությունում, պետական կառավարման համակարգում հաջողություններ ունենալու համար պետք է մեծ տեղ հատկացնել երիտասարդությանը, քանի որ  երիտասարդների արտահոսքն է «արնաքամ» անում տնտեսությունը և երկրի առաջընթացը: Այս մասին Panorama.am-ի թղթակցի հետ զրույցում ասաց «Այլընտրանք» հետազոտական կենտրոնի ղեկավար, տնտեսագետ Թաթուլ Մանասերյանը՝ հավելելով, որ երիտասարդներին չպետք է հիշել միայն պատերազմի ժամանակ, սահմանը պահելիս, իսկ դրանից հետո նրանց թողնել բախտի քմահաճույքին, ինչպես եղավ արցախյան պատերազմից հետո:

«Այն ժամանակ հաղթանակը կերտած մարդիկ՝ լուրջ մասնագետներ, մտավորականներ, արհետավարժ մարդիկ, այսօր անգործ են: Մենք շատ անփույթ ենք նրանց հետ վարվել: Ես կցանկանայի, որ այսօր սահմանում կանգնած երիտասարդների հետ նույն կերպ չվարվեն՝ նրանց տան ոչ միայն կրթություն ստանալու, այլև ստացած գիտելիքը օգտագործելու երաշխիքներ: Մինչև դա չլինի, մենք տնտեսությունում, պետական կառավարման համակարգում առաջընթաց չենք ունենա»,- նշեց Թաթուլ Մանասերյանը:

Միաժամանակ նա ասաց, որ անընդունելի է, երբ գիտությունը ղեկավարում են այնպիսի մարդիկ, ովքեր  բացարձակ չեն  պատկերացնում գիտության դերը տնտեսության, հանրային կառավարման առաջընթացի մեջ: Ուստի, ըստ տնտեսագետի,  բարեփոխումներ են անհրաժեշտ և կրթության, և գիտության ոլորտներում՝ ապահովելով երիտասարդ կադրերի ներհոսքը գիտության ոլորտ, իրականացնելով գիտական ներուժի սերնդափոխություն:

Նրա խոսքերով՝ նախկինում եղած գիտական դպրոցներն այսօր գոյություն չունեն, քանի որ սերնդափոխություն չի կատարվել: Մինչդեռ, նրա կարծիքով, երիտասարդ կադրերին այստեղ պատրաստում են, իսկ հետո արտագաղթի միջոցով նվիրում այլ երկրներին, որոնք ոչ մի լումա չեն ներդրել այդ երիտասարդների կրթության գործում: Վերջիններս  ստանում են պատրաստի կադրեր և նրանց շնորհիվ ապահովում իրենց երկրների առաջընթացը:

Ինչ վերաբերում է կրթական համակարգին, ապա Թաթուլ Մանասերյանն այս խնդրին մոտենում է ոչ միայն որպես տնտեսագետ, այլ նաև որպես պրոֆեսոր, ով դասավանդում է երիտասարդներին:

«Տարբեր բուհերում դասավանդելու իմ փորձառությունը ցույց է տալիս, որ փող վաստակելու համար բուհերը հրաշալի երիտասարդների կողքին հավաքում են նաև այնպիսի ուսանողների, ովքեր ոչ միայն սովորելու բացարձակ ցանկություն չունեն, այլև կապ չունեն կրթության հետ: Դրա համար կրթության որակն ընկել է և լուրջ մտահոգություն կա՝ ովքե՞ր են մեր ապագա տնտեսագետները, դիվանագետները, որքանո՞վ են նրանք մրցունակ այլ երկրների իրենց սերնդակիցների հետ: Որպես գիտելիք փոխանցող՝ ես չգիտեմ ո՞ւմ եմ կրթում՝ ապագա գործազուրկին, դիպլոմը օժիտում նախատեսող մարդո՞ւն, թե լուրջ մասնագետի»,- նշեց նա:

Տնտեսագետի  դիտարկմամբ՝  հատկապես չի կարելի փոշիացնել պետպատվերի շրջանակում իրականացվող կրթության միջոցները և կրթել ապագա գործազուրկների:

Անդրադառնալով ապրիլյան պատերազմին մասնակից և առաջնագծում ծառայություն իրականացնող զինվորների կրթությանը, ովքեր ծառայությունն ավարտելուց հետո պետք է շարունակեն իրենց ուսումը, Թաթուլ Մանասերյանն ասաց, որ նրանց համար բոլոր արգելքները, այդ թվում՝  վարձավճարի հետ կապված, պետք է հանվեն:

«Պետությունը պետք է ցույց տա, որ ինքը տեր է այն մարդկանց, ովքեր այսօր տեր են կանգնում հայրենիքին: Ըստ էության՝ ի հարգանքս պետության առաջին դեմքերի, այսօր Հայաստանի իրական տերը զինվորն է: Եթե մենք զինվորին չպետք է մեծարենք և նրան հետագայում կրթվելու լիարժեք հնարավորություն չտանք, մենք չենք կարող կայացած պետություն դառնալ: Մեզ պատիվ չի բերի, եթե այդ երիտասարդները հիասթափվեն կամ ապրեն  Հայաստանում  խեղճ ու աղքատ»,- նկատեց Թաթուլ Մանասերյանը:

Ուստի, ըստ նրա, և Կառավարությունը, և կրթության և գիտության նախարարության ղեկավարությունը լուրջ ուշադրություն պետք է դարձնեն այս հարցերին: