Ձեր վստահելի աղբյուրը

Տուլայի մարզի Ուզլովայա քաղաքի մոտակայքում Մոսկվա-Երևան ուղերթն իրականացնող ավտոբուսի վթարի գործով մեղադրվող Գառնիկ Հարությունյանը նախաքննության կարծիքով միակ մեղավորն է, իսկ հայկական «Կինգ դելյուքս» ընկերությանը, որին պատկանել է տվյալ ավտոբուսը, որևէ  կապ չունի վթարի հետ: Լրագրողների հետ հանդիպման ժամանակ ասաց  Գ. Հարությունյանի շահերի պաշտպան, ARMROSS Ռուս-Հայկական իրավաբանների ասոցիացիայի ասոցիացիայի նախագահության խորհրդի անդամ, փաստաբան Կարեն Ներսիսյանը:

«Նախաքննության հետևությունն ու եզրակացություն է, որ ամեն ինչի մեղավորը միայն վարորդն է»,- նշեց նա:

Հիշեցնենք, որ 2015 թ. նոյեմբերի 3-ին Մ-4 դաշնային ավտոճանապարհի 220-րդ կմ-ում՝ Տուլայի տարածաշրջանի Ուզլովսկիյ շրջանի Իլինկա գյուղի մոտակայքում Մոսկվա-Երևան երթուղու «Կինգ Դելյուքս» ՍՊԸ տրանսպորտային ընկերությանը պատկանող «Higer» մակնիշի 510 OP 61 պետհամարանիշով ավտոբուսը դուրս էր եկել երթևեկելի մասից և շրջվել: ՃՏՊ-ի հետևանքով զոհվել է 9 մարդ, տուժել ՀՀ քաղաքացիներ:

Ըստ փաստաբանի, դատավարությունն ընթանում է Տուլայի մարզի մի խուլ քաղաքի դատարանում, հասարակության ուշադրությունից հեռու:

«Իրականում դատավարությունը չկա, ձևականություն է: Խախտում են, ինչ կարելի է խախտել:  Պաշտպանությունը ոչ մի հեռանկար չի տեսնում, որ դատավարության ժամանակ ճշմարտությունը  կպարզվի»,- ասաց Կ. Ներսիսյանը:

Ներկայումս որպես տեղի ունեցած վթարի գլխավոր վարկած դիտարկում է երթևեկության թույլատրելի արագության գերազանցումը, սակայն, ըստ փաստաբանի, վթարը տեղի է ունեցել այն պատճառով, որ ավտոբուսն ունեցել է գործանային խոտան, որի պատճառով ընթացքի ժամանակ կոտրվել է արգելակային համակարգի մի հատված, ինչն էլ հանգեցրել է ողբերգական վթարի:  Նա նշեց, որ վթարի ենթարկված ավտոբուսի ընդհանուր տեխնիկական վիճակի շուրջ փորձագիտական զննությունը ցույց է տվել այդ խոտանը:

«Վստահ ենք, որ նպատակ չեն դրել պարզել ճշմարտությունը: Մեր կարծիքով, «Higer» մակնիշի ավտոբուսի արտադրող չինական կազմակերպությունը, որի արտադրած ավտոբուսներն աշխարհի շատ երկրներում է շահագործվում, ու եթե պարզվեր, որ խոտանի պատճառով է եղել, այդ ընկերության բիզնսը շատ կտուժեր: Ձեռնարկել են ամեն ինչ, որպեսզի ճշմարտությունը թաքցնեն: Բոլորին հայտնի է, որ Ռուսաստանի իրավապահ մարմիններն աչքի չեն ընկնում  իրենց ազնվությամբ: Կարծում ենք, որ չինական ընկերությանը հաջողվել է այդ հարցը դրականորեն լուծել իրենց օգտին»,- ասաց նա:

Կ. Ներսիսյանի խոսքով, տուժողների պաշտպանությամբ հանդես է գալիս ազգությամբ եզդի փաստաբան, ով նույնիսկ հայերեն չգիտի. «Հայկական դեսպանությունը, երևի դրդվելով իր լավ նպատակներով և ցանկություններով, չէր կարող անտեսել այդ ողբերգությունը և իր ուժերի չափ փորձել է օգնել, որպեսզի տուժածների շահերը ներկայացնեն իրավաբանները: Չգիտենք ինչու՝ շահերի ներկայացուցիչը եղել է ազգությամբ եզդի, հայերեն չիմացող փաստաբանի: Նա դեսպանությունից  ներկայացրել էր նամակ և դրա հիման վրա  ներկայացրել տուժողների շահերը»:

Ըստ մեղադրական եզրակացության, վթարից տուժել է 21 մարդ, մահացել 9-ը, բայց, փաստաբանի խոսքով, տուժողներն ավելի շատ են, բայց ինչ-ինչ պատճառներով այդ մարդկանց շահերը դուրս են մնացել:

«Հստակ կարծիք ունենք, որ այդ պաշտպանը չի ծանոթացել գործին, 18 հատոր քրեական գործի մեջ ոչ մի հայտարարություն,  բողոք չկա տուծաժների անունից: Արդեն դատական հինգ նիստ կայացել է, բայց որևէ նիստի տուժողներից որևէ մեկը չի ներկայացել: Ինչո՞ւ: Մենք շահագրգռված ենք, որ նիստերն ընթանան նրանց մասնակցությամբ, օրինական: Մենք հայտարարեցինք դատարանում, որ այս պայմաններում չի կարող դատավարությունն ընթանալ, պահանջեցինք քրեական գործը վերադարձվի դատախազին, նախաքննության մարմին, որպեսզի իսկական տուժողները հնարավորություն ունենա մասնակցել նախաքննությանը, դատավարությանը: Եթե վարորդն արդարացվի, դատախազությունը, վերադաս դատավորները մեծ հաջողությամբ կպահանջեն վերանայել գործը, որովհետև չի պահպանվել տուժողների իրավունքները: Դա հիմք է, որպեսզի դատավճիռը չմտնի ուժի մեջ»,- ասաց նա:

Միաժամանակ փաստաբանը հավելեց, որ իրենք պահանջում են նշանակել համալիր փորձազննություն, ամենահեղինակավոր փորձագետները տան միակ հարցի պատասխանը՝ ինչն է վթարի պատճառը:

Ըստ Կ. Ներսիսյանի, այն վարկածը, որ վարորդը քնած է եղել, հերքվել է, վկա կա. այդ պահին վարորդի կողքին նստած է եղել ուղևորներից մեկը:

Պաշտպանն ասաց, որ Հայաստանում նույնպես հարուցված է քրեական գործ «Կինգ դելյուքս»-ի դեմ,  որ չի ապահովել անվտանգ ծառայություն:

«Մենք ցանկանում ենք իմանալ, թե քննչական մարմինները ինչ եզրակացության են հանգել: Մենք պարզել ենք, որ չինական ընկերությունը սկզբում այդ մակնիշի երեք ավտոբուս էր արտադրել, երեք նմուշ: Հաշվի առնելով այն, որ այդ մակնիշի ավտուբուսները մի քանի ամսում շատ էին վթարի ենթարկվել, ունեցել էին խոտաններ, չինական արտադրությունը ստիպված հրաժարվել էր այդ մակնիշի շահագործումից: Հետաքրքիր է,  Հայաստանի քննչական մարմինները կարողացան պարզել, մենք նամակ, միջնորդագիր էինք ներկայացել, հանգամանքրեը, թե ինչպես են այդ ավտոբուսները հայտնվել Հայաստանում, ով է գնել, որտեղից է գնել: Գրեթե վստահ ենք, որ եթե ավտոբուսները լինեին ոչ խոտան, համապատասխան տեխնիկական զննման կենթարկվեին ապահովագրական պաշտոնական սերվիսներում»: