Ձեր վստահելի աղբյուրը

«Կան լրացուցիչ հարցեր, որոնք ուսումնասիրվում են», -այսօր Ազգային ժողովում լրագրողների հետ ճեպազրույցում հայտարարեց Էկոնոմիկայի նախարար Արծվիկ Մինասյանը՝ պատասխանելով մենաշնորհների վերաբերյալ ցուցակի կազմման մասին հարցին:

Հիշեցնենք՝ վարչապետ Հովիկ Աբրահամյանը երեք շաբաթ ժամանակ էր տվել էկոնոմիկայի նախարարությունը՝ պարզելու՝ որոնք են Հայաստանում մենաշնորհները և կազմել դրա վերաբերյալ ցուցակ:

Վարչապետի տված երեքշաբաթյա ժամկետը, նկատենք, ավարտվում է այս հինգշաբթի՝ հունիսի 2-ին:

«Եթե ես երեք շաբաթից չհասցնեմ, դրա վերաբերյալ գնահատականը կտա կառավարության ղեկավարը», -ասաց Մինասյանը:

Էկոնոմիկայի նախարարությունը եզրակացությունը վարչապետի նախանշած ժամկետին չի ներկայացնի:

«Պատասխանատվությունը իմ վրա է, որովհետև ես չեմ ուզում հրապարակել մի փաստաթուղթ, որը լիարժեք տեղեկատվական ապահովվածություն չունի: Դրա համար ես ինքս, գուցե, կխնդրեմ վարչապետին, որպեսզի երկարացնի ժամկետը», -նշեց Մինասյանը:

Այդուհանդերձ, նախարարն ասաց, որ այդ տեղեկատվության հավաքագրման աշխատանքներն իրենք իրականացնում են, բայց համապատասխան տեղեկատվության առումով ապահովված չեն, հետևաբար կարիք կա ժամկետները երկարացնելու:

Նա ասաց, որ միայն իր նախաձեռնությունը չէ մենաշնորհների դեմ պայքարելը ու թվարկեց մենաշնորհի դեմ պայքարելու պայմանները. «Գոյություն ունի նախագահի ելույթ, սահմանադրական նորմ, երկու ուժերի միջև կնքված համաձայնագիր, որտեղ սևը սպիտակի վրա գրված է ակտիվ հակամենաշնորհային քաղաքականության նախաձեռնության մասին, ի վերջո, տրվել է վարչապետի հանձնարարականներ: Սա կամքի դրսևորում է, չէ՞, գործ անելու հիմք է, չէ՞: Մնացածը կախված է, մասնավորապես, ինձանից, ես որքանով կկարողանամ առաջարկել լուծման արդյունավետ տարբերակներ»:

Արծվիկ Մինասյանը միաժամանակ հորդորեց իրենից չակնկալել «հետաքննչական մարմինների ֆունկցիաներ» և գործելու է իր լիազորությունների շրջանակում:

«Երբ որ դուք ակնկալում եք, որ ես դատախազի ֆունկցիա պետք է իմ վրա վերցնեմ, այդպիսի սպասում մի ունեցեք: Ես շատ լավ գիտեմ՝ իմ լիազորությունը որն է»,- հավելեց նա:

Ինչ վերաբերում է մենաշնորհների դեմ պայքարում իր լիազորություններին, նախարարն ասաց, որ ինքը պետք է մշակի տնտեսական մրցակցության պաշտպանության քաղաքականությունը, ուսումնասիրել շուկաները, ապահովել, որ հակադեմպինգային քաղաքականության իրականացումը լինի չափելի, գնահատելի, տեսանելի և նպաստել մրցունակ տնտեսության համար հիմքեր:

Հարցին, թե Մինասյանի հակամենաշնորհային քաղաքականությունը որոշ գործարարների համար ցավո՞տ է լինելու, նախարարը պատասխանեց. «Դուք ինձ դրել եք սուրճի բաժակ նայողի տեղ, հարցեր եք տալիս, որոնք ապագայի մասին են: Ինձ թվում է՝ բոլոր նրանք, ովքեր կողմ չեն ազատ մրցակցությանը, ցավ են զգալու: Եվ դա ամենևին էլ կապված չէ այսօրվա հայտնի անունների հետ»: