Հայտնի են առաջին Հայկական PR մրցանակաբաշխության հաղթողները
Beeline-ը և «Հայկական Փի Ար ասոցիացիա» գիտատեղեկատվական հասարակական կազմակերպությունը պարգևատրել են առաջին Հայկական PR մրցանակաբաշխության հաղթողներին:
«ԱրմենՏել» ՓԲԸ հասարակայնության հետ կապերի հաղորդմամբ՝պարգևատրման հանդիսավոր արարողության ժամանակ հայտարարվել են PR մրցանակաբաշխության մրցանակակիրները և հաղթողները տասներեք անվանակարգերում:
Մրցանակակիրները յուրաքանչյուր անվանակարգում ընտրվել են հանրային կապերի ոլորտում իրականացված ուսումնասիրությունների արդյունքում: Ուսումնասիրությանը մասնակցել է 50 փորձագետ, 50 խմբագիր և լրագրող, ինչպես նաև 7 ֆոկուս խումբ: Ուսումնասիրությունները ներառել են պետական մարմինների (մամուլի քարտուղար, հասարակայնության հետ կապերի ծառայության ղեկավարներ), բանկային համակարգի մասնագետների, զանգվածային լրատվական միջոցների կողմից իրականացված աշխատանքներ, ինչպես նաև 2015 թ. Հայաստանում իրականացված PR նախագծեր և միջոցառումներ: Թեկնածուների ցանկից հաղթողներին ընտրել է մասնագիտական հանձնաժողովը, որի կազմում են ԶԼՄ-ների ներկայացուցիչներ, հայտնի հասարակական և պետական գործիչներ, հեռուստահաղորդավարներ և PR ոլորտի մասնագետներ. Արամ Աբրահամյան, Վիկտոր Սողոմոնյան, Գևորգ Ալթունյան, Հրաչուհի-Մերի Պողոսյան, Տաթև Այրումյան, Աստղիկ Ավետիսյան։
«Որպես երկրի հեռահաղորդակցության խոշորագույն օպերատորի ղեկավար` ես իմ սեփական փորձով բազմիցս համոզվել եմ, որ հաջողության հասնելու համար անհրաժեշտ է կայացնել ճիշտ որոշումներ և օգտագործել հաղորդակցության ճիշտ մոդելներ: Հանրային կապերի գրագետ մասնագետներն անհրաժեշտ են ցանկացած բիզնեսում կամ հասարակական գործիչի համար, և ես շատ ուրախ եմ, որ հենց Beeline-ը ոչ միայն աջակցում է այս ոլորտին, այլ նաև հիմնել է ազգային մրցանակ, որի հաղթողներին մենք այսօր պարգևատրում ենք: Շնորհավորում եմ Առաջին հայկական PR մրցանակաբաշխության բոլոր մրցանակակիրներին ու հաղթողներին և մաղթում հետագա մասնագիտական հաջողություններ և նվաճումներ», - նշել է Հայաստանում Beeline-ի Գլխավոր տնօրեն Անդրեյ Պյատախինը:
«Հանրային կապերի ոլորտում 2015 թվականը հագեցած էր տարաբնույթ աշխատանքներով, վերելքներով և անկումներով, PR ոլորտում համագործակցության ուղիներով, հետաքրքիր ծրագրերով ու նախաձեռնություններով: Այսօր` 2016 թվականի մայիսի 31-ին, մենք սկիզբ ենք դնում Հայկական PR մրցանակաբաշխությանը, որն այսուհետ ամեն տարի կամփոփի PR ոլորտի ձեռքբերումներն ու բացթողումները, կգնահատի լավագույն PR ծրագրերն ու նախաձեռնությունները, կխրախուսի PR ոլորտի լավագույն մասնագետներին, հրապարակային և քաղաքական գործիչներին: Մենք ձգտելու ենք հասնել նրան, որ PR ծրագրեր ու նախաձեռնություններ արարելը, PR լավագույն մասնագետ դառնալը լինի ոչ թե ձգտում, այլ նպատակ, ինչը կդառնա հայկական PR մշակույթում առողջ մրցակցության և հասարակության հետ գրագետ փոխհարաբերություններ ձևավորելու գրավականը», - նշել է «Հայկական Փի Ար ասոցիացիա» գիտատեղեկատվական ՀԿ նախագահ, ԵՊՀ ռադիոհեռուստատեսային ժուռնալիստիկայի ամբիոնի դոցենտ, բ.գ.թ. Աստղիկ Ավետիսյանը:
Առաջին հայկական PR մրցանակաբաշխությունը նպատակ ունի համակարգել Հայաստանում հանրային կապերի (PR) ոլորտում իրականացվող լավագույն ծրագրերը, ինչպես նաև ըստ արժանվույն գնահատել հանրային կապերի մասնագետներին՝ նպաստելով Հայաստանում PR մշակույթի ձևավորմանն ու զարգացմանը: 2016 թ. մրցանակաբաշխությունը ներառել է տասներեք անվանակարգ. «Տարվա մամուլի քարտուղար», «Տարվա PR իրադարձություն», «Տարվա իմիջային PR», «Տարվա հրապարակային գործիչ», «Տարվա քաղաքական գործիչ», «Տարվա մշակութային PR», «Տարվա ֆինանսական PR», «Տարվա ԶԼՄ», «Տարվա ճգնաժամային կառավարում», «Տարվա PR նախաձեռնություն», «Հայաստանի բարեկամ», «Հայկական բրենդ», «Հատուկ մրցանակ»: Հանձնվել են նաև մի շարք հատուկ մրցանակներ PR ոլորտի զարգացման համար:
Աղբյուրը հիշեցնում է, որ հայկական PR մրցանակաբաշխությունը նվիրվում է Հայաստանի և Արցախի անկախության 25-ամյակին, ինչպես նաև «Հայկական Փի Ար ասոցիացիա» գիտատեղեկատվական ՀԿ 10-ամյակին: Հայկական PR մրցանակաբաշխության գլխավոր հովանավորն է Հայաստանում Beeline-ը:
13 անվանակարգում հաղթող են ճանաչվել՝
Տարվա մամուլի քարտուղար -Արծրուն Հովհաննիսյան` ՀՀ պաշտպանության նախարարի մամուլի քարտուղար
Տարվա PR իրադարձություն -«System Of A Down» (SOAD) ռոք խմբի «Արթնացե´ք հոգիներ» երևանյան համերգը
Տարվա իմիջային PR - Հայոց ցեղասպանության 100-րդ տարելիցի միջոցառումները համակարգող պետական հանձնաժողով
(Ցեղասպանության 100-րդ տարելիցը ոչ թե սգով, այլ երախտագիտության և վերածննդի ուղերձներով խորհրդանշելու, ինչպես նաև հայ ազգի ուժեղ և կանգուն կերպարի ամրապնդման համար)
Տարվա հրապարակային գործիչ -Արմեն Աշոտյան
Տարվա քաղաքական գործիչ - Էդմոն Մարուքյան
Տարվա մշակութային PR - «Երևան ՏԱՐԱԶֆեստ» փառատոն («Տերյան» մշակութային կենտրոն)
Տարվա ֆինանսական PR - «Ամեն բան լավ է լինելու» նախաձեռնություն («ԱԿԲԱ-ԿՐԵԴԻՏ ԱԳՐԻԿՈԼ ԲԱՆԿ» ՓԲԸ)
Տարվա ԶԼՄ - «Մեդիամաքս» լրատվական գործակալություն
Տարվա ճգնաժամային կառավարում - ՀՀ պաշտպանության նախարարություն (2015 թ., սահմանային լարվածություն)
Տարվա PR նախաձեռնություն - «100 կյանք» մարդասիրական նախաձեռնություն
Տարվա պետական կառույց - ՀՀ Նախագահի աշխատակազմի Հասարակայնության և տեղեկատվության միջոցների հետ կապերի վարչություն
Հայաստանի բարեկամ - Էրիկաս Պետրիկաս՝ Հայաստանում Լիտվայի արտակարգ և լիազոր դեսպան
Հայկական բրենդ - Հենրիխ Մխիթարյան
Հատուկ մրցանակ - Դավիթ Բաբայան` ԼՂՀ նախագահի մամուլի քարտուղար
Հատուկ մրցանակ - Արա Սաղաթելյան` «Հասարակայնության հետ կապերի հայաստանյան ասոցիացիա» ՀԿ հիմնադիր
Հատուկ մրցանակ - Սամվել Մարտիրոսյան՝ մեդիա փորձագետ
Լրահոս
Տեսանյութեր
Իմ կարծիքով, շատ տգեղ բան եք անում. Եղոյանը՝ Լուսինե Հակոբյանին
