Ձեր վստահելի աղբյուրը

Գերմանիայի Բունդեսթագում հունիսի 2-ին «1915 և 1916 թվականներին հայերի և մյուս քրիստոնյա փոքրամասնությունների ցեղասպանության հիշատակի և ոգեկոչման մասին» խորագիրը կրող բանաձևի քվեարկության ժամանակ իշխող կոալիցիան մեծ հավանականությամբ «այո» է ասելու դրան:

Ի հերթին Թուրքիայի նախագահ Ռեջեփ Թայիփ Էրդողանը նախազգուշացրել է պաշտոնական Բեռլինին, որ բանաձևում «կոտորածներ» տերմինը «ցեղասպանություն» եզրույթով փոխարինելու Բունդեսթագի որոշումը անխուսափելիորեն լուրջ հարվածի տակ կդնի երկու երկների դիվանագիտական, տնտեսական, քաղաքական, ռազմական և բիզնես հարաբերությունները:

Էրդողանն այս մասին հայտնել է լրագրողներին երեքշաբթի օրը՝մայսի 31-ին՝ Աֆրիկա կատարվելիք այցից առաջ: Թուրքիայի նախագահը նաև հիշեցրել է, որ թե՛ գերմանիան և թե՛ Թուրքիան ՆԱՏՕ-ի անդամ երկրներ են: 

Այս մասին գրում է գերմանական «Deutsche Welle»-ն: Գերմանիայի իշխող կուսակցության մաս կազմող Սոցիալ-դեմոկրատական կուսակցության խորհրդարանական խմբակցության ղեկավար Քրիստինե Լամբրեհտը հայտնել է, որ իր կուսակցության պատգամավորներից բանաձևին դեմ քվեարկություն չի ակնկալում:

«Քրիստոնեական միություն» կուսակցությունների խորհրդարանական խմբակցության ղեկավար Ֆրանց Յոզեֆ Յունգը, հիշեցնելով, որ նախորդ տարի Գերմանիայի նախագահ Յոահիմ Գաուկը Ցեղասպանության 100-րդ տարելիցին նվիրված իր ելույթում կիրառել է «ցեղասպանություն» եզրույթը, նշել է, որ Դաշնային խորհրդարանի որոշման մեջ պատմական իրադարձությունները հստակորեն իրենց անուններով կկոչվեն: Յունգը հայտնել է, որ մայիսի 31-ին Քրսիտոնեա-դեմոկրատական միություն և Քրիստոնեական- սոցիալական միություն կուսակցությունների խորհրդարանական խմբակցությունը պրոբացիոն քվեարկություն է արել, որի արդյունքով մեծամասնությունը բանաձևին կողմ է քվեարկել, մեկը` դեմ, երկուսը` ձեռնպահ:

Կառավարության փոխխոսնակ Քրիստիան Վիրցը հայտնել է, որ Գերմանիայի կանցլեր Անգելա Մերկելը սատարում է բանաձևին և պրոբացիոն քվեարկության ժամանակ նույնպես կողմ է քվեարկել դրան: Այդուհանդերձ, իր ունեցած պայմանավորվածությունների պատճառով Մերկելը հունիսի 2-ին կայանալիք քննարկմանն ու քվեարկությանը չի կարողանալու մասնակել:

Գերմանիայի խորհրդարանը դեռևս 2005 թվականին ընդունել է 1915  թվականին  Օսմանյան կայսրությունում  հայերի զանգվածային  բնաջնջման, էթնիկ  զտումների և աքսորի  մասին բանաձև,  որում,  սակայն նշված չի եղել «ցեղասպանություն»  եզրույթը:

Գերմանիայի դիրքորոշման մեջ շրջադարձ տեղի ունեցավ 2015թ. ապրիլի 20-ին` Գերմանիայի Դաշնության արտաքին գործերի նախարար Ֆրանկ-Վալտեր Շտայնմայերի և կանցլեր Անգելա Մերկելի խոսնակ Շտեֆան Զայբերթի հայտարարություններից հետո: Իսկ ԳերմանիայիԴաշնության նախագահ Յոահիմ Գաուկն ապրիլի 23-ին  Բեռլինի Մայր տաճարում կայանացած Հայոց ցեղասպանության հիշատակի արարողությանն իր ելույթում հայերի կոտորածները «ցեղասպանություն» որակեց:

2015 թվականի ապրիլի 24-ին Բունդեսթագում քննարկման  դրվեց 1915  թվականին  Օսմանյան  կայսրությունում  հայերի  Ցեղասպանությունը  ճանաչող նոր բանաձև: Նիստը բացեց Բունդեսթագի նախագահ Նորբերթ Լամերթը, ով 1915 թվականի Օսմանյանկայսրությունում տեղի ունեցած պատմական դեպքերն անվանեց ցեղասպանություն: Նիստի ընթացքում  տարբեր  կուսակցական  խմբակցությունների  ղեկավարներ ևս հայանպաստ հայտարարություններ արեցին՝  ընդունելով կատարվածը: Սակայն բանաձևի  քվերակությունը հետաձգվեց  անորոշ ժամանակով: