Ձեր վստահելի աղբյուրը

«Որոշ ցուցադրական բաներ վարչապետի հանձնարարականներից հետո լինելու են: Որքան ինձ է հայտնի դարձել՝ բանանի շուկան կիսելու են, իսկ շաքարավազի  շուկան՝ բացառված է»,-Մեդիա կենտրոն»-ում  «Կոռուպցիայի դեմ պայքար. իրականությու՞ն, թե՞ իմիտացիա» թեմայով քննարկման ժամանակ ասաց տնտեսական հարցերի մեկնաբան, լրագրող Հայկ Գևորգյանը:

Իր վերջին պնդման մեջ տնտեսական մեկնաբանն ավելի քան վստահ է. «Եթե մի օր շաքարավազի շուկայում մոնոպոլիան վերացավ, ուրեմն արևը դուրս է գալու արևմուտքից, այ էդ կարգի»:

Ինչ վերաբերում է բանանի շուկայում նոր ներկրող հայտնվելուն, ապա Հ. Գևորգյանը համոզված չէ, որ դա կհանգեցնի հավասար մրցակցության ապահովմանը: Նա չի բացառում, որ «Քեթրին գրուպ» ընկերությունից բացի, բանան սկսի ներկրել այդ ընկերություն սեփականտիրոջ «բաջանաղի ընկերը, ով ամեն դեպքում կլինի նրա վերահսկողության ներքո»:

«Այնպես որ չշտապենք»,-ասաց Հ. Գևորգյանը:

Հիշեցնենք, որ կառավարության այսօրվա նիստում վարչապետը հայտարարել էր.

«Քննարկումների արդյունքում եզրահանգել ենք, որ սոցիալական նշանակություն ունեցող կարևորագույն ապրանքային շուկաները, ինչպիսիք են շաքարավազի, ալյուրի, ցորենի, ձեթի, բրնձի, հնդկաձավարի, կարագի, մարգարինի, բանանի, նարնջի, մանկական սննդի, թռչնի մսի, դեղորայքի, բենզինի և դիզելային վառելիքի շուկաները, թեև ֆորմալ առումով մենաշնորհային չեն, սակայն, հանրության կողմից ընկալվում են որպես մենաշնորհ: Պատճառն այն է, որ այս ապրանքային շուկաներում առկա է կենտրոնացվածության բարձր աստիճան, ինչը բերում է այնպիսի ռիսկերի, ինչպիսիք են մրցակցության խաթարումը, փոքր և միջին ձեռնարկատերերի շուկայից դուրս մղումը և նորերի մուտքի սահմանափակումը, սպառողների շահերի ոտնահարումը, կոռուպցիան, գների անհիմն տատանումները և ի վերջո երկրում համախառն տնտեսական վնասի առաջացումը»: