Բունդեսթագի կողմից Հայոց ցեղասպանության ճանաչումը դռներ է փակում դեպի ժխտողականություն. Շարմազանով
Բունդեսթագի կողմից Հայոց ցեղասպանությունը ճանաչող բանաձևի նախագծի ընդունումը մեկ անգամ ևս ցույց է տալիս, որ Գերմանիան և գերմանացի պատգամավորները հավատարի են մարդու իրավունքերի պաշտպանության և ժողովրդավարական արժեքներին; Այս մասին այսօր ՀՀԿ ԳՄ նիստից հետո լրագրողների հետ զրույցում ասաց ՀՀԿ խոսնակ, ԱԺ փոխնախագահ Էդուարդ Շարմազանովը:
Նրա խոսքերով՝ Հայոց ցեղասպանության ճանաչումը շատ կարևոր է նաև այն առումով, որ Օսմանյան Թուրքիայի երբեմնի դաշնակիցը առաջին աշխարհամարտում, դատապարտում է Հայոց ցեղասպանությունը և, փաստորեն Թուրքիան, ըստ Շարմաազանովի, այս պայքարում մնում է միայնակ:
«Կարևոր է Գերմանիայի ճանաչումը նաև այն առումով, որ Թուրքիայի դաշնակիցն Առաջին աշխարհամարտում ընդունում է նաև իր մեղսակցությունը: Այսօր ես հեռախոսազրույց եմ ունեցել Բունդեսթագի փոխնախագահ տիկին Բուլմանի հետ, բարձր եմ գնահատել գերմանացի պատգամավորների նման դիրքորոշումը և ևս մեկ անգամ վերահաստատել, որ առանցքայինը նա է՝ մի պետություն, որն առաջին աշխարհամարտում եղել է Թուրքիայի դաշնակիցը, ճանաչեց Հայոց ցեղասպանությունը: Տարոսը մնացած երկրներին»,- ասաց Էդուարդ Շարմազանովը:
Դիտարկմանը, թե հայ-թուրքական հարաբերություններն ավելի կվատանան, Էդուարդ Շարմազանովը նշեց, որ Հայաստանի Հանրապետության կարծիքը հստակ է՝ հայ-թուրքական արձանագրությունները պատմության խորքային պահոց է մտցրել Թուրքիան, որը հանդես եկել նախապայմաններով, իսկ դա նշանակում է, որ հաշտեցման համար հենց Թուրքիան պետք է քայլեր կատարի:
«Դժբախտաբար Թուրքիան հետ քայլ է կատարում, հետ է կանչում Գերմանիայից Թուրքիայի դեսպանին, Թուրքիայի քաղաքական վերնախավի բազաթիվ գործիչներ արդեն հասցրել են էմոցիոնալ հայտարարություններով հանդես գալ, հաշվի առնելով այն հանգամանքը, որ քվեարկությունից առաջ և հետո շանտաժները շարունակվում են, նշանակում է, որ Թուրքիայի քաղաքական վերնախավը պատրաստ չէ առերեսվել և հաշտվել սեփական պատմության հետ, գրեթե ոչինչ չի սովորել: Դրա վառ ապացույցն այն է, որ եթե 101 տարի առաջ Թուրքիայում սպանում են խորհրդարանի հայազգի ներկայացուցիչ Գրիգոր Զոհրաբին, իսկ 101 տարի անց ծեծում են հայազգի ներկայացուցիչ Գարո Փալյանին միայն նրա համար, որ նա հայ է: Այսինքն՝ խնդիրը Թուրքիայի մեջ է»,- ընդգծեց Շարմազանովը:
Նա նշեց նաև, որ հավատում է՝ ուշ թե շուտ միջազգային քաղաքականության բոլոր դերակատարները պետք է ճանաչեն Հայոց ցեղասպանությունը:
«Եթե միջազգային հանրությունն ուզում է, որ նոր ցեղասպանություններ չկրկնվեն, միակ ուղին նախկին ցեղասպանությունների դատապարտումն է: Բունդեսթագի բանաձևի ընդունումով դռներ են բացվում դեպի նոր ճանաչումներ, դռներ են փակվում դեպի ժխտողականություն, նորանոր հանցագործություններ մարդկության նկատմամբ: Դժբախտաբար, Թուրքիայի քաղաքական ղեկավարությունը դեռևս պատրաստ չէ առերեսվել սեփական պատմության հետ»,- ասաց ՀՀԿ խոսնակը՝ հավելելով, որ իհարկե Թուրքիայում կան բազմաթիվ գործիչներ, որոնք ոչ միայն դատապարտում են Հայոց ցեղասպանությունը, այլ նաև այցելում են Հայաստան և Ծիծեռնակաբերդի հուշահամալիրում իրենց հարգանքի տուրքը մատուցում զոհերի հիշատակին:
Լրահոս
Տեսանյութեր
Դուք մասնակից եք դարձել պետականության կործանմանը. Բագրատ Սրբազանը՝ ՔՊ-ականներին
