Ձեր վստահելի աղբյուրը

Քաղաքագետ Ստյոպա Սաֆարյանը Գերմանիայի օրենսդիր մարմնի կողմից Հայոց ցեղասպանության ճանաչման վերաբերյալ բանաձևի ընդունումը բավականին լուրջ քայլ է համարում:

«Եթե Եվրամիության առավել հզոր, ազդեցիկ և այլևս թելադրող երկրի բոլոր քաղաքական ուժերը անվերապահ միանում են այս տեքստին, պետք է հասկանալ, որ սա պետության դիրքորոշում է, և ոչ միայն ներկայացուցչական մարմնի կարծիք, դա դառնալու է Գերմանիայի քաղաքականությունը»,-լրագրողների հետ հանդիպմանը նման կարծիք հայտնեց Միջազգային և անվտանգության հարցերի հայկական ինստիտուտի հիմնադիր, քաղաքական վերլուծաբանը:

Նման մեծ երկրի պարագայում կոնսենսուսի հասնելը բավականին բարդ գործ է, դա երկարատև ու դժվարին աշխատանք է պահանջում. «Սա վերին աստիճանի լուրջ մի բան է, որը կարճաժամկետ դրսևորում չի լինելու: Երբ ես ընթերցեցի այն, ինձ հիշեցրեց գիտահետազոտական կենտրոնի կողմից պատրաստված քաղաքականության ամփոփագիր, որտեղ հստակ տեսանելի են նաև քաղաքական հանձնարարականները, թե ինչ ուղղություններով պիտի զարգանա խնդիրը»:

Սաֆարյանը ևս չբացառեց, որ բանաձևի ընդունմանը նպաստեց Թուրքիայի շանտաժային քաղաքականությունը միգրացիոն խնդրի վերաբերյալ:

«Մի շարք գործոններ նպաստել են, որ Թուրքիային իր տեղը ցույց տան»,-ասաց նա: