Ձեր վստահելի աղբյուրը

Ցեղասպանության ճանաչման բանաձևի ընդունումը 100 տոկոսով բխում է Գերմանիայի ներքին շահերից,-«Մեդիա կենտրոն»-ում «Գերմանիայի Բունդեսթագում Հայոց ցեղասպանության մասին բանաձևի ընդունման քաղաքական հետևանքները» թեմայով քննարկման ժամանակ տեսակետ հայտնեց քաղաքագիտության դոկտոր Հայկ Մարտիրոսյանը:

Նրա գնահատմամբ՝ հայերի համար դեռևս որևէ մեկը ոչինչ չի արել. «Սովորաբար նման բանաձևերն ընդունվում են ապրիլի 24-ին ընդառաջ, ոչ թե հետո: Ընդունվեց հիմա, որովհետև Գերմանիայի՝ Թուրքիայի հետ հարաբերությունների, հետաքրքրությունների առումով պահը հասունացել էր հիմա, այն հիմա էր պետք Գերմանիային»:

Բանաձևի բովանդակության վերաբերյալ ևս նա վերապահումներ ունի:

«Ցեղասպանություն տերմինն օգտագործվում է  միայն բանաձևի վերնագրում ու առաջին մասում, որպես հղում այլ ցեղասպանությունների: Մնացած բոլոր տեղերում ամբողջ տեքստում օգտագործվում է մասայական կոտորած, տարհանում տերմինները, որոնք նման Ցեղասպանությունների  մասին խոսելիս, միշտ ասոցացվում են մերժողականության ու ժխտողականության հետ»,-ասաց Մարտիրոսյանը:

Քննարկման մասնակիցը սխալ է համարում նաև «այլ քրիստոնյա ժողովուրդների» նկատմամբ ցեղասպանության  իրականացում բառակապակցությունը:

«Քրիստոնյա բառը բավականին վտանգավոր դեր է ստանձնում այստեղ: Ես ուղղակի չեմ ուզում հավատալ, որ Բունդեսթագը սա արել է կանխամտածված: Հայաստանում նույնպես շատերը հավատում են, որ ցեղասպանությունը կատարվեց, քանի որ հայերը քրիստոնյա էին: Չկա նման բան: Կոնկրետ 1915 թ. ցեղասպանությունը կատարվեց էթնիկ զտման նպատակով, բնիկ տարրին՝ հայերին  Թուրքիայի տարածքից վերացնելու և ոչնչացնելու համար: Այդ ժամանակ ոչնչացվեցին նաև այլ  էթնիկ ու կրոնական փոքրամասնություններ: Սա վտանգավոր բան է, որ կարող է հայերին ու Հայաստանին հակասության մեջ դնել մահմեդական աշխարհի հետ: Նման բացթողում ուղղակի Բունդեսթագն իրավունք չուներ թույլ տալու»,-ասաց նա:

Քաղաքագետն անընդունելի է համարում նաև ցյուրիխյան փաստաթղթերին հղումը, քանի որ «դրանք մեռած են»:

«Շատ վատ դրույթ է, երբ ասվում է, պետք է խթանվի Թուրքիայի կողմից հայկական հուշարձանները վերականգնելուն ուղղված սկսված գործընթացը: Բացահայտորեն Բունդեսթագը կուլ է տվել Թուրքիայի քարոզչական խայծը: Այդ ժառանգությունը ոչնչացվում է, ինչպես ոչնչացվում է Ցեղասպանությունից ի վեր: Անընդունելի է հայ-թուրքական հաշտեցման մասին խոսելը, որովհետև հայերը թուրքերի հետ չեն գժտվել, թուրքերը պարզապես ոչնչացրել են հայերին»,-ասաց Մարտիրոսյանը: