«Քաղաքային քանդակ»-ը կրկին Երևանի դիմագծով հետաքրքրվածների դատին է ներկայացնելու նոր նախագծեր

Մշակույթ 17:03 04/06/2016 Հայաստան

«Քաղաքային քանդակ-2016» նախագիծի ցուցադրությունն այս տարի տեղի կունենա հոկտեմբերին։ Ծրագրի համակարգող, քանդակագործ Նունե Թումանյանը Panoarma.am-ի հետ զրույցում ասաց, որ աշնանը կրկին կկարողանան արվեստասերների և Երևանի դիմագծով հետաքրքրվածների դատին ներկայացնել նոր նախագծերի ցուցադրությունը։

«Շատ լավ կլինի, եթե այս անգամ մեզ միանան նախորդ ցուցադրությանն ինչ-ինչ պատճառներով չմասնակցած մեր ընկերները։ Մասնակիցների քանակի ավելացումը առավել հետաքրքիր կդարձնի ցուցադրությունը. ստեղծագործողներից յուրաքանչյուրն ունի իր մոտեցումը, իր ոճային առանձնահատկությունը, իր ասելիքը... Ներկայացվող նախագծերի համար չկա ոճայի սահմանափակում»,-նշեց նա՝ ընդգծելով, որ ուղղակի չեն մասնակցելու հուշա.... քանդակները (հուշաքարերի, հուշատախտակների, հուշարձանների, հուշաղբյուրների նախագծեր, ինչպես նաև կոնկրետ կերպար ներկայացնող կամ դիմաքանդակ հանդիսացող քանդակների նախագծեր)։

«Խրախուսվում է մտքի ազատությունն ու բազմազանությունը՝ չմոռանալով այն փաստը, որ քանդակները նախատեսված են լինելու քաղաքային միջավայրի համար։ Մեծ ցանկություն ունեմ մեր տաղանդաշատ քանդակագործների հոծ բանակն իր ողջ փայլով ներկայացնել արվեստասերներին»,- ասաց ծրագրի համակարգող Նունե Թումանյանը:

Ցուցադրությանը ներկայացվելու են քաղաքային միջավայրի համար նախատեսված ստեղծագործությունները և դրանց ֆոտոմոնտաժները, արված թվային տեխնիկայով, տպված Ա-1 կամ Ա-2 չափի ՊՎԽ-ի վրա։ Ցուցադրվող նախագծերը, նախքան ցուցադրվելը ընտրվելու են հանձնաժողովի կողմից։

Հիշեցնենք, որ այս նախագիծն առաջին անգամ ներկայացվել էր 2015-ին:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: