Պետք է շարունակել զորակցել սիրիահայությանը. Արամ Առաջին

Հասարակություն 16:45 04/06/2016 Աշխարհում

Պետք է շարունակել զորակցել սիրիահայությանը. Արամ Առաջին

Մեծի Տանն Կիլիկիո Ն.Ս.Օ.Տ.Տ. Արամ Ա Կաթողիկոսը վերջին օրերին պարբերաբեր հեռախոսազրույց է ունեցել Բերիոյ Թեմի Առաջնորդ Գերշ. Տեր Շահան Սրբազան արքեպիսկոպոս Սարգսյանի հետ՝ հետաքրքրվելով Սիրիայում, մասնավորապես Հալեպում տիրող իրավիճակից: Այս մասին տեղեկանում ենք Կիլիկիո կաթողիկոսարանի պաշտոնական կայքից:

Հեռախոսազրույցի ընթացքում պարզ է դարձել, որ, չնայած անապահով պայմաններին, Հալեպի հայությունը շարունակում է իր ազգային, եկեղեցական, կրթական, մշակութային կյանքը:

Նշվում է, որ Հալեպի հայության թիվը որոշ չափով նվազել է, մեծ թվով հայեր բնակություն են հաստատել Լաթաքիայում, Տարտուսում, Քեսաբում, Սիրիայի ծովեզրյա շրջաններում:

Ըստ աղբյուրի, Վեհափառ Հայրապետը հայ ժողովրդի զավակներին ցանկանում է հիշեցնել սիրիահայ համայնքի վերականգնման հրամայականի անհրաժեշտությունը:

«Ճիշտ է՝ մեր ազգային կյանքում ունենք այլ առաջնահերթություններ, սակայն Սիրիայի հայության զորակցությունը մնում է առաջնահերթություն և անհետաձգելի անհրաժեշտություն: Հետևաբար, պետք է շարունակել զորակցել սիրիահայությանը»,- շեշտել է Արամ Առաջինը:

Հիշեցնենք, որ վերջին օրերին Հալեպը, մասնավորապես հայաբնակ Նոր Գյուղ թաղամասը ահաբեկիչների կողմից հրթիռակոծվում է: Հունիսի 2-ին Նոր գյուղ թաղամասում հրթիռակոծության հետևանքով 4 հայ է զոհվել, կան ավելի քան 16 վիրավորներ, որոնց թվում նույնպես հայեր կան: Հրթիռակոծությունից նաև վնասներ են կրել Հայ Կաթողիկէ Սբ. Երրորդություն եկեղեցին և դպրոցը:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: