Բունդեսթագի ընդունած բանաձևը լուրջ հոգեբանական և բարոյական հարված էր թուրքական կողմին. Հ.Դեմոյան

Քաղաքական 13:06 06/06/2016 Հայաստան

Բունդեսթագի ընդունած բանաձևը լուրջ հոգեբանական և բարոյական հարված էր թուրքական կողմին. Հ.Դեմոյան

Գերմանիայի դաշնային խորհրդարանի (Բունդեսթագ) կողմից Հայոց ցեղասպանության ճանաչման վերաբերյալ ընդունած բանաձևը լուրջ հոգեբանական և բարոյական հարված էր թուրքական կողմին, թուրքական ժխտողականության և թուրքական պետության բարոյական և հոգեբանական լրջագույն պարտություն էր վերջին մի քանի տասնամյակների ընթացքում: Լրագրողների հետ հանդիպման ժամանակ ասաց Հայոց ցեղասպանության թանգարան-ինստիտուտի տնօրեն Հայկ Դեմոյանը:

Ըստ նրա, Թուրքիան նախկինում Հայոց ցեղասպանությունը ժխտելու հարցում շատ քիչ մանևրելու դաշտ ուներ, իսկ այս որոշումից հետո գրեթե մանրևելու տեղի չի մնում՝ ոչ ակադեմիական դաշտում, ոչ պատմաբանների հանձնաժողով հրավիրելու և հարցը քննարկելու համար:

«Բանաձևի ընդունումը հուժկու հարված էր թուրքական դիրքերին: Թե ինչ պաշտպանական գիծ կընդունի Թուրքիան, որը մի անուն ունի՝ ժխտողականություն, ցույց կտա ժամանակը, բայց վստահաբար կարող ենք արձանագրել, որ չի լինի այն, ինչ 5-15 տարի առաջ: Կարող է լինել նոր մոդիֆիկացված տարբերակ՝ փափուկ ժխտողականության առումով: Տասնամյակներ շարունակ մշակված ժխտողական քաղաքականությանից այս որոշումից հետո գրեթե ոչինչ չի մնացել»,- ասաց նա:

Հ. Դեմոյանի խոսքով, Գերմանիան, լինելով Առաջին աշխարհամարտում Թուրքիայի դաշնակից երկրի իրավահաջորդը, այս որոշմամբ փակեց մեղսակիցների շթղան: Բացի այս, ըստ նրա, Գերմանիան ԵՄ ամբողջ շարժիչն է, և Թուրքիան շատ լավ հասկանում է, որ նման ճանաչումից հետո եվրոպական այլ երկրներ նույնպես կարող են հետևել Գերմանիայի քայլին:

«Սա շատ լավ հասկանում են Անկարայում: Իրավիճակը պետք է խուճապայինին մոտ լինի, որևէ հակափաստարկ այստեղ չի աշխատի»,- ասաց Հայկ Դեմոյանը:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: