Ձեր վստահելի աղբյուրը

Ինչպես նշել ենք՝ Ղազախստանում հատուկ ծառայությունները 13 հոգուց բաղկացած ծայրահեղականների խմբավորում են վնասազերծել, որոնք, ըստ ղազախական աղբյուրների՝ «ծրագրում էին իրագործել պետական հեղաշրջում»: Դեպքին ուրույն մոտեցումներ ունեն ռուսական և արևմտյան ԶԼՄ-ները։ Ռուսականն, օրինակ, կրկին «արևմտյան հետք» է «գտել»։

Թարգմանաբար, հակիրճ ներկայացնում ենք svpressa-ի հոդվածը՝ տեղ թողնելով ինքնուրույն դատել Ռուսաստան-Չինաստան նոր «բարեկամական կապերում» ռուսական զանգվածային ինֆորմացիոն դիվանագիտությունը։ Հոդվածի ենթավերնագիրն է. «Արևմուտքը կարող է կործանել Եվրասիական միության և «Մետաքսյա ճանապարհի» ծրագրերը՝ Ղազախստանում հեղաշրջման միջոցով»։  

Ռուսական « Свободная Пресса» պարբերականի սյունակագիր Անդրեյ Իվանովը, հղում կատարելով ղազախական հատուկ ծառայությունների հաղորդած տեղեկություններին,  գրում է, թե խմբավորման պարագլուխը եղել է «Шымкенпиво» ընկերության տնօրեն Տոխտար Տուլեշովը:

«Նրա գործողությունների պլանը նախատեսում էր ապակայունացնել երկրում իրադրությունը՝ լարվածության օջախների ստեղծման ճանապարհով, բողոքի ակցիաների ու զանգվածային անկարգությունների կազմակերպմամբ, որոնց ֆոնի վրա Տուլեշովը նախատեսում էր ձևավորել այսպես կոչված այլընտրանքային կառավարություն և փոխել գործող իշխանության կառուցվածքը»,-մեջբերում է հոդվածագիրը  Ղազախստանի Ազգային անվտանգության կոմիտեի պաշտոնական հաղորդագրությունը և մեկնաբանում, որ եթե այս տեղեկությունները ճիշտ են, ապա հարվածի տակ են հայտնվում Ռուսաստանի և Չինաստանի կողմից եվրասիական տարածաշրջանում նախաձեռնված ինտեգրացիոն գործընթացները:

Ըստ հոդվածագրի՝ Ղազախստանն ավանդաբար եղել է քաղաքականապես կայուն պետություն, սակայն վերջին շրջանում, հատկապես այս տարվա ապրիլ և մայիս ամիսներին Ղազախստանում տեղի ունեցան հասարակական հուզումներ և դժգոհության ալիքներ, որոնք Ղազախստանի քաղաքական քարացած համակարգի համար դարձան ամրության տեստ:

«Բոլորը գուշակում են, թե ով է լինելու պետության հաջորդ ղեկավարը: Այսօր Նուրսուլթան Նազարբաևը ազգի աներկբա առաջնորդն է, բոլորն, անգամ նրանք, ովքեր դժգոհ են Նազարբաևի տնտեսական քաղաքականությունից, ընդունում են, որ նրա ջանքերի շնորհիվ Ղազախստանին հաջողվեց խուսափել ներքին պառակտություններից և քաղաքական խժդժություններից:  Բայց նա 75 տարեկան է, ու ոչ մեկ չի պատկերացնում, թե ինչ կերպ է իշխանությունը փոխանցվելու նրա իրավահաջորդին, անգամ ոչ մեկ չի պատկերացնում, թե ով է լինելու այդ իրավահաջորդը:

Միևնույն ժամանակ պետք է հասկանալ, որ Ղազախստանի քաղաքական կայունությունից է կախված Եվրասիական տարածաշրջանում տնտեսական ու քաղաքական ինտեգրացման նախագծերի ապագան: Չինաստանը տասնյակ միլիարդավոր դոլարներ է ներդրել այսպես կոչված «Նոր մետաքսի ճանապարհի» նախագիծը կյանքի կոչելու համար: Միևնույն ժամանակ Ղազախստանը Ռուսաստանի հիմնական դաշնակիցն է Եվրասիական տնտեսական միության և ՀԱՊԿ-ի շրջանակներում: Այդ իսկ պատճառով, պղտորելով ջրելը Ղազախստանում, հնարավոր է մի հարվածով կործանել Մոսկվայի ու Պեկինի բազմաթիվ աշխարհաքաղաքական ամբիցիաներ»,-գրում է հոդվածագիրը: