Ձեր վստահելի աղբյուրը

Հայաստանը ապրում է ճակատագրական ժամանակներ: Ապրիլյան քառօրյա պատերազմը և դրա հետևանքով ձևավորված իրողությունները ակնհայտ են դարձնում մեր երկրի արմատական և արագ արդիականացման հրամայականը,- այսօր Ազգային ժողովում հայտարարությունների ժամին ասաց ԱԺ ՀԱԿ խմբակցության ղեկավար Լևոն Զուրաբյանը։

Ընդդիմադիր պատգամավորի պնդմամբ՝ պետք է կարճ ժամանակահատվածում ապահովել բանակը անհրաժեշտ սպառազինություններով, համալրել տեխնոլոգիապես ժամանակակից զինատեսակներով:

«Հայաստանը պետք է արմատապես վերափոխի գործող տնտեսական համակարգը: Այս առումով առաջնահերթ քայլերն են՝ մենաշնորհների և կոռուպցիայի վերացումը, ազատ և արդար մրցակցության երաշխավորումը, փոքր և միջին բիզնեսի զարգացման խթանումը:

Հայաստանը պետք է հիմնովին փոխի գործող ընտրական համակարգը՝ երաշխավորելով ազատ և արդար ընտրությունների անցկացումը և լեգիտիմ իշխանությունների ձևավորումը: Վերջապես պետք է համաձայնություն կայացվի ընդդիմության, իշխանությունների և քաղաքացիական հասարակության միջև օրինական ընտությունների ապահովման մեխանիզմների շուրջ», -նշեց պատգամավորը:

Շարունակելով անհրաժեշտ փոփոխությունների թվարկում, պատգամավորը նկատեց, որ պետք է վերափոխվի արդարադատության համակարգը և «Հայաստանում այլևս երբեք և ոչ ոք չպետք է դատապարտվի քաղաքական հայացքների համար»:

«Այս քայլերը կպահանջեն լուրջ զիջումներ այօրվա իշխանությունների կողմից, բայց այլընտրանք չունեն, եթե ցանկանում ենք հաղթանակած դուրս գանք առկա մարտահրավերներից», -հավելեց նա: