Ձեր վստահելի աղբյուրը

Ազգային ժողովի պատգամավոր Նիկոլ Փաշինյանը ուսումնասիրել է վերջին չորս տարիների բյուջեի կատարողականները ու համեմատությունների արդյունքում հիշել «Կարգին հաղորդում» մանրապատումներից մեկը:

«Երբ հիմնանորոգվող բնակարանի սեփականատերը գալիս, մտնում է նորոգվող տուն և արձանագրվում է, որ նորոգող վարպետը՝ Պետո անունով, որևէ բան չի արել ու հաշիվ է պահանջում՝ ասում է՝ ի՞նչ ես արել էս մի ամսվա ընթացքում: Պետոն ասում ա՝ շեֆ ջան բա էղա՞վ, լուսամուտը դրիմ, ասում ա՝ հետո, լուսամուտը դրիմ, վերևի գյաջ-մյաջ էր թափվել, սիրուն մաքրիմ, հավքիմ, լվացիմ ու պատուհանը փակիմ, հիմա նայում ես՝ վաախ», -ԱԺ այսօրվա նիստում բյուջեի կատարողականի քննարկման ժամանակ ծիծաղելով պատմեց Փաշինյանը:

Նրա պնդմամբ, չորս տարիների ընթացքում ոչինչ չի փոխվել. բոլոր կատարողականներում գրվում է ասենք՝ Իրան-Հայաստան 400 կ/վտ լարման էլեկտրահաղորդման գծի կառուցում, բայց ինչ է արվել այս տարիների ընթացքում:

«Լավ հաջորդ հարցը՝ Իրան-Հայաստան երկաթուղի, ի՞նչ արիր կառավարություն ջան, դո հուշագիրը ստորագրիմ, գնացիմ, եկամ, էլի գնացիմ: Հաջորդը՝ Հայաստան-Վրաստան 400 կվտ լարման էլեկտրահաղորդման օդային գծի ծրագիրը: Բա ի՞նչ արիր կառավարություն ջան, դե էլի՝ նախագիծը գծիմ, ուսումնասիրեցիմ, նայիմ», -նմանեցնելով իր մատնանշած մանրապատումին, ասաց պատգամավորը:

Բայց այդքանի մեջ Փաշինյանը կոնկրետ կատարված բան նկատել է՝ դեկտեմբերի 29-ին բացվել է Հյուսիս-հարավ ճանապարհային միջանցքի Երևան-Արտաշատ 31 կմ-անոց հատվածը, բայց էլի կան խնդիրներ. «Ուզում եմ տեղյակ պահել, որ դրանից մեկ ամիս հետո այդ հատվածի մի մասը փակվել է ու մինչև հիմա էլ փակ է»:

Բյուջեի կատարողականը ԱԺ դահլիճում ներկայացնող ՀՀ ֆինանսների փոխնախարար, ՀՀ գանձապետ Ատոմ Ջանջուղազյանը գնահատեց Փաշինյանի գեղարվեստական համեմատությունները ու հավելեց.

«Բոլոր այն հարցերը, որոնք դուք ներկայացրեցիք, իրենց պարզաբանումները դրանց հետ կապված ծրագրերն իրականացնող մարմինները տվել են: Այլ հարց է, որ այդ պարզաբանումները կարող են ձեզ չբավարարել»:

Այդուհանդերձ, իր արձագանքման ժամանակ Փաշինյանը հայտարարեց, որ եթե լիներ կառավարությանը «կարգին ասող» խորհրդարան, հնարավոր է նշված ծրագրերի մասով միանգամայն այլ իրավիճակ լիներ:

«Կառավարությանը ուղղակի կարգին ասող չկա, որ պարտավորությունները պետք է ճշգրիտ իրականացնել», -հավելեց պատգամավորը: