Ձեր վստահելի աղբյուրը

Հայոց ցեղասպանության ճանաչումը  Բունդեսթագի կողմից անտարակույս էր:  Լրագրողների հետ հանդիպման ժամանակ ասաց ԵՊՀ արևելագիտության ֆակուլտետի թյուրքագիտության ամբիոնի վարիչ, պրոֆեսոր Ալեքսանդր Սաֆարյանը:

«Այն հանգամանքը, որ Հայոց ցեղասպանության ճանաչման հարցը Բունդեսթագ էր մտցվել թե իշխող կոալիցիայի կողմից և թե ընդդիմության պատգամավորներն այն պետք է պաշտպանեին, արդեն անտարակույս էր դարձնում նման որոշումը: Պարզ էր, որ այն պետք է ընդունվեր կամ գրեթե միաձայն, կամ, ըստ էության, միաձայն,   ինչպես տեղի ունեցավ: Կողմ քվեարկեցին նաև ծագումով թուրք պատգամավորները»,- ասաց նա: 

Ա. Սաֆարյանի խոսքով, այսօր Թուրքիայում հաճախ հարցականի տակ է դրվում անգամ այդ պատգամավորների ազգային պատկանելիությունը, ինչն, իհարկե, եվրոպական ընկալման տեսանկյունից բացարձակապես անընդունելի է: 

«Կարող է  եվրոպական մտավորականության կողմից ընկալվի որպես ռասիզմի դրսևորում»,- նշեց պրոֆեսորը:

Ըստ նրա, այսօր Թուրքիան լրջագույն խնդիր ունի իր մտավորականության ինքնաիդենտիֆիկացիայի, արժեհամակարգի ընտրության, քաղաքակրթական, մշակութային արժեքների դաշտում որոշակի բախումների առումով: Այս խնդիրները, Ա. Սաֆարյանի խոսքով, նեոօսմանիզմի քաղաքականության հետ կապված գնալով ավելի սրվելու են:

«Մյուս կողմից ժամանակակից թուրքական քաղաքական վերնախավի կողմից որդեգրված արտաքին ագրեսիվ քաղաքականությունն անպայմանորեն խնդիրներ է հարուցելու բուն Թուրքիայում ներքին քաղաքականության տեսանկյունից»,- ասաց նա:

Ա. Սաֆարյանը նաև նշեց, որ Բունթեսթագի որոշումից հետո թուրքական, ադրբեջանական վերլուծական կայքերի, ռազմավարական ուսումնասիրությունների կենտրոնների, հասարակական, քաղաքական գործիչների ճնշող մեծամասնության ծայրահեղ նեգատիվ, ջղագրգիռ արձագանքը մի կողմից խոսում է Թուրքիայում և Ադրբեջանում որոշակի խառնաշփոթի մասին, մյուս կողմից Բունդեսթագի որոշման բացառիկ կարևորության մասին:

Ըստ նրա, Գերմանիայի կողմից Հայոց ցեղասպանության ճանաչման որոշումը, անշուշտ, Հայոց ցեղասպանության միջազգային ճանաչման երկարատև գործընթացում կարևորագույն օղակ է, ոչ առաջինն է, ոչ էլ վերջինը կլինի, խթան է հանդիսանալու նաև այլ երկրների կողմից Ցեղասպանության ճանաչման գործընթացում:

ԵՊՀ արևելագիտության ֆակուլտետի թյուրքագիտության ամբիոնի վարիչի խոսքով, կայացած պետականություն, հզորագույն մշակութային, քաղաքակրթական մշակութային  ժառանագության կրող Գերմանիան չէր կարող ենթարկվել թուրքական, ադրբեջանական ճնշումներին:

Նա նշեց, որ ադրբեջանական մամուլը փորձում է Գերմանիայի որոշումը դիտարկել  իբրև Եվրոպայի մայրամուտի դրսևորում:

«Ոչ, այդ որոշումը խոսում է Եվրոպայի վերակենդանացման մասին, սեփական մշակութային հարուստ ժառանգության վրա հենվելով՝ ամենածանր մարտահրավերներին նորովի պատասխան տալու մասին»,- ասաց Ա.Սաֆարյանը: