ԵԽ-ն Ադրբեջանից պահանջում է հստակ քայլեր՝ հայատյացության դեմ պայքարելու համար
Եվրոպայի խորհրդի «Ընդդեմ ռասիզմի և անհանդուրժողականության եվրոպականհանձնաժողովն» (ECRI) այսօր հրապարակել է Ադրբեջանի վերաբերյալ զեկույցը։ ECRI-ին Ադրբեջանի զեկույցում բարձրացնում է մի շարք խնդիրներ, որոնք մտահոգությունների տեղիք են տալիս։ Զեկույցը մանրամասնորեն անդրադառնում է Ադրբեջանում հայատյացության խնդրին։ Ինչպես ասվում է զեկույցում, քաղաքական ղեկավարները, կրթական հաստատությունները, ինչպես նաև լրատվամիջոցները շարունակում են հայերի նկատմամբ ատելություն քարոզել։
«Ադրբեջանցիների մի ամբողջ սերունդ մեծացել է՝ լսելով այս ատելության հռետորաբանությունը։ Հայաստանի հետ հաշտեցման կողմնակից մարդու իրավունքների ակտիվիստները վիճելի մեղադրանքներով դատապարտվել են ազատազրկման»,-ասվում է զեկույցում։
Ավելին, զեկույցն անդրադարձ է կատարում նաև Ռամիլ Սաֆարովին, ում 2012թ․-ին Ադրբեջանի իշխանությունների կողմից ներում շնորհվեց։
«Բուդապեշտում հայկական բանակի ծառայողին սպանելու համար ցմահ ազատազրկման դատապարտված Ռամիլ Սաֆարովին Ադրբեջանի իշխանությունները ներում շնորհեցին, ազատ արձակեցին և պաշտոնական առաջխաղացում կատարեցին՝ առանց հաշվի առնելու ռասիստական հանցագործություններ կատարողների մոտ անպատժելիության զգացման ձևավորման վտանգը»,-ասվում է զեկույցում։
ECRI-ն Ադրբեջանի իշխանություններից պահանջում է գործողություններ ձեռնարկել, որպեսզի պետական պաշտոնյաները զերծ մնան հայերի նկատմամբ ատելության ելույթներից և ստեղծեն համապատասխան պայմաններ՝ բազմազան և անկախ քաղաքացիական հասարակության ձևավորման համար։
Զեկույցը կազմողները նշում են, որ Ադրբեջան այցերի ժամանակ իշխանությունները նշում են, որ Ադրբեջանը բարձր հանդուրժողականություն ունեցող երկիր է, որտեղ շատ հազվադեպ են ատելության ելույթները։
ECRI-ն ի գիտություն է ընդունում այս խոսքերը և փաստում հակառակը՝ նշելով, որ 2014թ․-ի հոկտեմբերին ադրբեջանական մամուլի ուսումնասիրության արդյունքներով լրատվության 3,9 տոկոսը եղել է ատելության քարոզ, որոնց մեծամասնությունն ուղղված է հայերի դեմ։
Այս առումով, ECRI-ն Ադրբեջանի իշխանություններին կոչ է անում հայերի հետ կապված խնդիրներին անդրադառնալիս չներկայացնել բացասական լույսի ներքո և չստեղծել թշնամանքի մթնոլորտ։
Նշվում է նաև, որ Լեռնային Ղարաբաղի հակամարտության հետ կապված Հայաստանն ու հայերը համարվում են «թշնամի», և տարածվում է բացահայտ ատելության ուղերձներ։ Ըստ ECRI-ի աղբյուրների, հակամարտության հետ կապված Ադրբեջանում առկա է ներքաղաքական դիսկուրս և Ադրբեջանի ղեկավարության շրջանում, կրթական համակարգում և լրատվամիջոցներում լայն տարածում ունի հայերին ուղղված զրպարտանքները։
«Քաղաքական մրցակիցները մեղադրվում են հայկական արմատներ ունենալու կամ հայկական աղբյուրներից հովանավորվելու մեջ։ Ադրբեջանցիների մի ամբողջ սերունդ մեծացել է՝ մշտապես լսելով հայկական ագրեսիայի մասին։ Ըստ 2012թ․-ի հետազոտության, 91 տոկոսը Հայաստանին ընկալում է որպես Ադրբեջանի ամենամեծ թշնամի»,- ասվում է զեկույցում։
Որպես ատելության ելույթների պատասխան՝ ECRI-ն գտնում է, որ անհրաժեշտ են հստակ գործողություններ՝ հայերին թիրախավորող ատելության ելույթների դեմ պայքարելու համար։
Նշվում է, որ հայերին ուղղված տելության ելույթների բազմաթիվ դրսևորումները Լեռնային Ղարաբաղի հակամարտության հետ կապված առճակատման քաղաքականության մասն են կազմում։
«Հաշվի առնելով ատելության ելույթների վնասակար հետևանքները՝ ECRI-ն կարծում է, ինչպես և ԵԱՀԿ Մինսկի խումբը, որ իշխանությունները պետք է վերջ դնեն այս մշտական, լրատվամիջոցներով տարածվող ատելության ելույթներին և փոխարենը խթանեն փոխըմբռնումն ու վստահությունը»,- ասվում է «Եվրոպայի խորհրդի Ընդդեմ ռասիզմի և անհանդուրժողականության եվրոպական հանձնաժողովի»՝ Ադրբեջանի վերաբերյալ զեկույցում։
Այս պահին զեկույցը պաշտոնական կայքում դեռ տեղադրված չէ, panorama.am-ը այն ստացել է պաշտոնական էլ-հասցեից։
Լրահոս
Տեսանյութեր
ՈւՂԻՂ. Տրանսպորտը թանկացնում են նախկինների մերժած հաշվարկով. Պիպոյանը փաստաթղթեր է հրապարակում
