Ձեր վստահելի աղբյուրը

Թեոդոսիայում գտնվող Հովհաննես Այվազովկսու  թանգարանում է պահվում նկարչի ամենամեծ հավաքածուն. 416 կտավի մեծ մասն ունի ավելի քան մեկ միլիոն եվրո ապահովագրական արժեք: Ռիա նովոստիին ասել է պատկերասրահի տնօրեն Տատյանա Գայդուկը:

Պատկերասրահում կան գեղանկարներ,  գրաֆիկական աշխատանքներ, էսքիզներ:
Տ.Գայդուկի խոսքով, թանգարանում ներկայացված է նկարչի մի քանի գրաֆիկական աշխատանք, որոնք բարդ տեխնիկայի շնորհիվ գեղարվեստական արժեքով չեն զիջում գեղանկարին:

Նրա խոսքով, Այվազովսկին տիրապետում էր ծովանկարչության բարձր տեխնիկայի, չէր ստեղծում իր կտավները օրվա կարիքներից ելնելով, այլ ստեղծում էր բարձր արվեստի օրինակներ: Այդ իսկ պատճառով, չնայած անցել է այսքան ժամանակ և աշխարհում շատ բան է փոխվել, Այվազովսկու կտավները նախկինի պես արժեքավոր են և  պահանջված:

«Այվազովսկին կիրառում էր այնպիսի տեխնիկա, երբ աշխատանքի վերջին էտապում կտավը գործիքների միջոցով հատուկ  ճանկռոտում էր: Սովորավար ալիքների վերին մասերն էր այդպես անում՝ ավելացնելով անհարթությունը: Դա շատ բարդ տեխնիկա է, երբ վերջին էտապում հնարավոր է փչացնել ամբողջ ստեղծագործությունը»,- ասել է նա:

Թանգարանի տնօրենի խոսքով, այժմ նախապատրաստվում են Այվազովսկու  200-ամյակին, որը միջազգային հանրությունը  նշելու է 2017 թվականի հունիսի  29-ին:  Նա կարևորել է «Այվազովսկի. Հաղթարշավի 200 տարի»  հրատարակչական նախագիծը:

«Իհարկե, կարևոր է պատմել Այվազվսկու մասին, ով շատ բան է արել մեր շրջանի զարգացման  համար: Կարևոր է նաև ասել այն մասին, որ նա, բացարձակապես  չժխտելով  իր հայկական արմատները,  ընկալում էր իրեն և  համաշխարհային գեղարվեսական գործընթացներում ներկայանում էր որպես ռուսական մշակույթի  ներկայացուցիչ»,- պատմել է թանգարանի տնօրենը:

Հովհաննես Այվազովսկին ծնվել է 1817 թվականին  Ղրիմում՝ Թեոդոսիա քաղաքում, Ղրիմում, աղքատ հայ ընտանիքում։ Իր ընտանիքի ազգանունն Այվազյան էր։ Նկարչի նկարներից մի քանիսը կրում են այս ստորագրությունը՝ «Հովհաննես Այվազյան»: Այվազովսկու նախնիները Գալիցիայի հայերից էին, ովքեր XVII–րդ դարում Գալիցիա էին գաղթել Արևմտյան Հայաստանից։ Նրա՝ որպես նկարչի տաղանդը, իր համար ճանապարհ է բացել դեպի Սիմֆերոպոլ քաղաքի գիմնազիա, իսկ հետագայում՝ դեպի Սանկտ Պետերբուրգի գեղարվեստի ակադեմիա, որը Հովհաննես Այվազովսկին ավարտեց ոսկե մեդալով։
Ստեղծել է 6000-ից ավելի կտավ, հիմնականում ծովանկարներ, քանզի ծովը նրա տարերքն էր, հետաքրքրությունների և բնության հանդեպ մեծ սիրո կենդանի մարմնացում: Նա չի անտեսել նաև հայրենի բնաշխարհը, հայկական թեմատիկան: Աշխատել է շատ արագ, տեսողական վիթխարի հիշողությամբ։ Իր հաջողակ ստեղծագործական գործունեության ընթացքում վաստակած զգալի գումարներով Այվազովսկին բացել է արվեստի դպրոց և պատկերասրահ իր հարազատ Թեոդոսիա քաղաքում։
Վախճանվել է 1900 թվականին։ Այվազովսկին թաղված է Թեոդոսիայում՝ հայոց միջնադարյան Սուրբ Սարգիս եկեղեցու բակում։ 1903 թ.նկարչի այրին մարմարե շիրմաքար է տեղադրել, որը իտալացի քանդակագործ Լ.Բիոջոլիի աշխատանքն է։ Շիրմաքարին գրաբար փորագրված են պատմահայր Մովսես Խորենացուխոսքերը. «Մահկանացու ծնեալ անմահ զիւրն յիշատակ եթող»։
Այվազովսկու գործերը աճուրդով վաճառվել են մինչև $2 միլիոն 125 հազար ամերիկյան դոլարով։
Հայ կերպարվեստում բնանկարի ժանրի հիմնադիրն է Հովհաննես Այվազովսկին: Ծովանկարիչ Հովհաննես Այվազովսկու արվեստը ժամանակի առաջադիմական գաղափարներն արտացոլող խոշոր մշակութային երևույթ է: Համաշխարհային հռչակ վայելող գեղանկարիչն ունեցել է հարյուր քսան անհատական ցուցահանդես, ներկայացրել իր արվեստը ոչ միայն Ռուսաստանում, այլ նաև եվրոպական երկրներում, Ամերիկայում: