Ձեր վստահելի աղբյուրը

Դիմորդներն ավելի գիտակ ու կազմակերպված են դարձել, շատ բան է փոխվել: Այսօր «Հայոց լեզու և հայ գրականություն» առարկայի միասնական քննության մեկնարկից հետո Panorama.am-ի հետ զրույցում ասաց Երևանի Մխիթար Հերացու անվան պետական բժշկական համալսարանի քննական կենտրոնի ղեկավար Անահիտ Մելքոնյանը:

«Ցուցակով ունեինք 160 դիմորդ, 10-ը չեն ներկայացել քննության»,-տեղեկացրեց քննական կենտրոնի ղեկավարը:

Նրա խոսքերով դիմորդների քննասեղանին պետք է լինի միայն ձևաթուղթ, գրիչ, անձնական փաստաթղթեր և թեստը:

Ինչ վերաբերում է հարցին, որ դիմորդները փորձում են իրենց հետ ջուր, շոկոլադ վերցնել, որը թույլ չտվեցին տանել դեպի քննասեղան, Անահիտ Մելքոնյանը նշեց. «Դրա կարիքը չկա, բոլոր քննակենտրոնները հագեցած են ջրով և բաժակներով, ցանկության դեպքում դիմորդը կարող է կազմակերպիչներին դիմել, մոտենալ և ջուր խմել»:

Մինչ քննության մեկնարկը զրուցեցինք նաև դիմորդների հետ, ովքեր ընդհանուր առմամբ Շտեմարանից բողոքներ չունեին:

Քննություն հանձնողների շարքում էր նաև անազատության մեջ գտնվող Շանթ Հարությունյանի որդին՝ Շահենը, ով ցանկանում է ընդունվել Երևանի Պետական Համալսարանի «Միջազգային հարաբերություններ» ֆակուլտետի՝ «Միջազգային հարաբերություններ» կամ «Քաղաքագիտություն» բաժիններից մեկը. «Շատ ուրախ կլինեմ, որ ընդունվեմ, ամբողջ տարի միայն պարապել եմ՝ դպրոց, լրացուցիչ պարապմունքներ, տնային աշխատանքներ: Հուսամ կընդունվեմ իմ ընտրած բաժիններից մեկը, ըստ էության տարբերություն չկա՝ թե որը, կարևորը կրթություն ստանամ իմ ընտրած բնագավառում: Ինձ լավ գիտելիքներ են տվել, այլ հարց է, թե ես ինչքան եմ վերցրել: Դա էլ կերևա քննությունները հանձնելուց հետո»:

Շանթը դեռ պետք է հանձնի «Անգլերեն լեզու» և «Հայոց պատմություն» առարկաներից միասնական քննություն:

Ուսուցչուհի դառնալ ցանկացող Մարիամ Ամալյանն էլ նշեց, որ հուզված  ու անհանգստացած է . «Երևի հիմա ամենաշատը հուզված են նրանք, ում առաջին միասնական քննություն է: Հուսամ մեկնարկս լավ կլինի»:

Երկրորդ միասնական քննությունը հանձնող Արևիկ Մկրտչյանն ավելի հանգիստ էր, չկար այն անհանգստությունը, որն ունեցել էր առաջին քննության ժամանակ. «Հոգեբան եմ ցանկանում դառնալ: Մինչ այս «Կենսաբանություն» առարկայից եմ քննություն հանձնել, գոհ եմ արդյունքներից»:

Հիշեցնենք, որ այսօր հանրապետության 30 քննակենտրոններում «Հայոց լեզու և հայ գրականություն» առարկայից քննություն կհանձնի 6267 դիմորդ: